ლიეტუვის სეიმმა დაამტკიცა ცვლილებები, რომელიც ქვეყნის არმიას საშუალებას აძლევს სწრაფად და მარტივად გაანეიტრალოს დრონები, რომლებიც საფრთხეს უქმნიან ქვეყნის საჰაერო სივრცეს.

მედიის ინფორმაციით, ავიაციის შესახებ კანონსა და სამხედრო ძალის გამოყენების შესახებ რეგულაციებში შეტანილ ცვლილებებს მხარი სხდომათა დარბაზში მყოფმა ყველა დეპუტატმა დაუჭირა.

თავდაცვის მინისტრმა დოვილე შაკალიენემ აღნიშნა, რომ აქამდე მოქმედი კანონმდებლობა და პროცედურები არ შეესაბამებოდა თანამედროვე საფრთხეებსა და მათ განვითარებად ხასიათს.

შესწორებების თანახმად, თავდაცვის მინისტრის ან მისი უფლებამოსილი წარმომადგენლის გადაწყვეტილებით, სამხედრო ძალის გამოყენება შესაძლებელია დრონების წინააღმდეგ აკრძალულ ან შეზღუდულ ზონებში, თუ მათი ფრენები არღვევს დადგენილ პირობებს, შეზღუდვებს ან პროცედურებს.

ცვლილებების განხორციელებამდე, სამხედროებს ძალის გამოყენების უფლება მხოლოდ იმ მფრინავი აპარატების წინააღმდეგ შეეძლოთ, რომლებიც შეზღუდულ ზონებში იარაღად გამოიყენებოდნენ.

ლიეტუვის თავდაცვის სამინისტროს განმარტებით, არმია უფრო მოქნილად და ეფექტურად შეძლებს უპასუხოს დრონების მიერ საჰაერო სივრცის დარღვევებს და, საჭიროების შემთხვევაში, გამოიყენოს სამხედრო ძალა საფრთხეების გასანეიტრალებლად.