მიხეილ სააკაშვილი - ივანიშვილმა ამ კვირაში გადმოატანინა ჩემი „სასამართლო“ განხილვები, კვირის დასაწყისში კი მკვეთრად ააჩქარა და ყოველდღე ჩანიშნა სხდომები - ჩემი შემდგომი „გასამართლება“ საჭიროა 4 ოქტომბრის წინ
ივანიშვილმა ამ კვირაში გადმოატანინა ჩემი „სასამართლო“ განხილვები, ხოლო კვირის დასაწყისში კი მკვეთრად ააჩქარა და ყოველდღე ჩანიშნა სხდომები, - ამის შესახებ მესამე პრეზიდენტი მიხეილ სააკაშვილი აცხადებს.
როგორც სააკაშვილის წერილშია ნათქვამი, ივანიშვილი ამას აკეთებს თავის კურატორების ინსტრუქციით.
„რატომ მაინცდამაინც ახლა? ამას აქვს სამი ძირითადი მიზეზი:
ეს კვირა ემთხვევა ჩემს გაეროში გამოსვლის წლისთავს, რომელმაც მაშინ დიდი პრობლემები შეუქმნა რუსებს.
კვირის ბოლოს მოლდოვაში იმართება არჩევნები, სადაც რუსეთი ისევეა ჩართული, როგორც აქ 2012-ში. შესაბამისად მათ სურთ ჩემი მდგომარეობის კიდევ უფრო მეტად დამძიმება.
მე მოლდოვაში ძალიან კარგად ვარ ცნობილი და ასევე ჩემი ახალი „სასჯელებით“ მოსკოვი სიგნალს უგზავნის ჩემს მეგობარს, პრეზიდენტ მაია სანდუს.
ასევე ჩემი შემდგომი „გასამართლება“ საჭიროა 4 ოქტომბრის წინ.
ყველაზე ცინიკური ისაა, რომ მე, რომელიც ვარ საქართველოში და უკრაინაში კორუფციის მთავარი მტერი და კორუფციასთან ერთ-ერთი მთავარი მებრძოლი მსოფლიოში, პატიმრობაში ვიმყოფები პიჯაკების ყიდვისთვის და „ვენოკებისთვის“, მაშინ როცა თითზე გადასახვევი არ წამიღია საქართველოდან“,- წერს სააკაშვილი თავის განცხადებაში.
