საქართველოს პროკურატურამ წინასწარი შეთანხმებით ჯგუფის მიერ, დიდი ოდენობით თანხის თაღლითურად დაუფლების მცდელობის ფაქტზე ორ პირს ბრალდება წარუდგინა. ამის შესახებ ინფორმაციას პროკურატურა ავრცელებს.

პროკურატურამ ორივე დაკავებულის მიმართ აღკვეთის ღონისძიების სახით პატიმრობის გამოყენების შუამდგომლობით სასამართლოს უკვე მიმართა.

„საქართველოს სახელმწიფო უსაფრთხოების სამსახურის ანტიკორუფციული სააგენტოს მიერ ჩატარებული გამოძიებით დადგინდა, რომ ბრალდებულებმა წინასწარი შეთანხმების საფუძველზე, ჯგუფურად განიზრახეს მართლსაწინააღმდეგოდ, მისაკუთრების მიზნით მოტყუებით დაუფლებოდნენ სხვის კუთვნილ დიდი ოდენობით ფულს. ბრალდებულები უცხო ქვეყნის მოქალაქეს, რომელსაც საქართველოში დროებითი ბინადრობის უფლების და მოქალაქეობის მიღება სურდა, მაღალი თანამდებობის პირებად გაეცნენ და დაარწმუნეს იგი, რომ მათი და მათთან დაახლოებული სხვადასხვა თანამდებობებზე მყოფი პირების გავლენების გამოყენებით, დაეხმარებოდნენ საქართველოში დროებითი ბინადრობის ვადის გაგრძელებაში, შემდეგ კი საქართველოს მოქალაქეობის მიღებაში, რაშიც 8000 ამერიკული დოლარი მოსთხოვეს.

მოთხოვნილი თანხის ნაწილის 4000 ლარის აღებისთანავე, საგამოძიებო უწყებამ ორივე ბრალდებული ადგილზე დააკავა.

აღნიშნული ქმედებისათვის დაკავებულ ერთ-ერთ პირს ბრალდება საქართველოს სისხლის სამართლის კოდექსის 19, 180-ე მუხლის მე-2 ნაწილის „ა“ და მე-3 ნაწილის „ბ“ ქვეპუნქტით (წინასწარი შეთანხმებით ჯგუფის მიერ სხვისი დიდი ოდენობით ნივთის მოტყუებით დაუფლების მცდელობა) წარედგინა, რაც სასჯელის სახედ და ზომად ცხრა წლამდე თავისუფლების აღკვეთას ითვალისწინებს.

მეორე დაკავებულს ბრალდება სისხლის სამართლის კოდექსის 19, 180-ე მუხლის მე-2 ნაწილის „ა“ ქვეპუნქტით, მე-3 ნაწილის „ბ“ ქვეპუნქტებითა და მე-4 ნაწილის „ბ“ ქვეპუნქტით, (წინასწარი შეთანხმებით ჯგუფის მიერ დიდი ოდენობით სხვისი ნივთის მოტყუებით დაუფლების მცდელობა იმის მიერ, ვინც ორჯერ ან მეტჯერ იყო ნასამართლევი სხვისი ნივთის მართლსაწინააღმდეგო მისაკუთრებისათვის) წარედგინა, რაც სასჯელის სახედ და ზომად ათ წლამდე თავისუფლების აღკვეთას ითვალისწინებს”, - ნათქვამია ინფორმაციაში.