თუ საქმე მოხვდა ისეთ მოსამართლესთან, რომელიც „ჭედავს“, იწყება ნელ-ნელა მუშაობა. ჯერ იწყება დარწმუნება - „გაგვიკეთე ეს საქმე და დაგაწინაურებთ“, მერე იწყება მუქარა, მერე იწყება ფულის შეთავაზება და ბოლოს ეუბნებიან, რომ ჩამოიცილე ეს საქმე, სხვას გადავაწერთ და სხვა გააკეთებს ამ საქმეს, - ამის შესახებ იურისტმა კახა წიქარიშვილმა სასამართლო სისტემაში არსებულ ვითარებაზე და უზენაესი სასამართლოს ყოფილი მოსამართლის, ბესო ალავიძის მიერ გაკეთებულ განცხადებებზე საუბრისას „პალიტრანიუსის“ გადაცემაში „რეზიუმე“განაცხადა.

კახა წიქარიშვილის თქმით, ბესო ალავიძის მიერ სასამართლო ხელისუფლების მიმართ გაკეთებული განცხადებები უპრეცედენტოა, რადგან ძალიან ბევრ ფაქტს და ინფორმაციას მოიცავს.

„ბესო ალავიძის ინტერვიუ განსაკუთრებულია იმით, რომ ის არის ძალიან დეტალური. ძალიან ბევრ ფაქტს და ინფორმაციას მოიცავს და უპრეცედენტოა ამ გაგებით. ასეთი დეტალური ინტერვიუ ჩვენ არცერთი მოსამართლისგან არ გვქონია. ასახელებს ძალიან ბევრ შემთხვევას და ჩანს მთელი მეთოდოლოგია, როგორ მუშაობს კლანი. პირველ რიგში, ისინი ცდილობენ, რომ შეარჩიონ მათთვის სასურველი მოსამართლე, თუ საქმე მოხვდა ისეთ მოსამართლესთან, რომელიც ჭედავს, იწყება ნელ-ნელა მუშაობა. ჯერ იწყება დარწმუნება - გაგვიკეთე ეს საქმე და დაგაწინაურებთ, მერე იწყება მუქარა, მერე იწყება ფულის შეთავაზება და ბოლოს ეუბნებიან, რომ ჩამოიცილე ეს საქმე, სხვას გადავაწერთ და სხვა გააკეთებს ამ საქმეს. მეთოდების მთელ სპექტრს იყენებენ“, - განაცხადა კახა წიქარიშვილმა.

კახა წიქარიშვილის თქმით, სასამართლო სისტემაში არსებული „კლანი“ მოსამართლეების თანაშემწეებს იყენებს ინფორმაციის მისაღებად და მოსამართლეებთან საკომუნიკაციოდ.

„ჩვენ ვიცით, რომ თანაშემწე მოსამართლესთან ერთად მუშაობს. თანაშემწისგან იღებენ ინფორმაციებს, იყენებენ თანაშემწეებს სხვებთან საკომუნიკაციოდ. მაგალითად მან [ბესო ალავიძე] თქვა, რომ ჩინჩალაძემ თავისი თანაშემწე მომიგზავნა და მერე ჩემი თანაშემწეების მეშვეობით ცდილობდნენ გაეგოთ, რა ხდება ჩვენ შემადგენლობაში. როცა რამდენიმე მოსამართლე მუშაობს საქმეზე, ერთ-ერთი მათგანი თუ არის თავმჯდომარისთვის სანდო, იმას მიაქვს ინფორმაცია, თუ რა გადაწყვეტილება მზადდება. თუ მიუღებელია ეს გადაწყვეტილება, იწყება მუშაობა, რომ შეიცვალოს გადაწყვეტილება“, - განაცხადა კახა წიქარიშვილმა.