4 ოქტომბრის დასკვნითი ნაწილი გაუგებარია და ამასთან დაკავშირებით სიცხადე პრაქტიკულად ნულოვანია. ვის შვილს, ვისი დედა აიყვანს, ამ კითხვაზე კაციშვილმა პასუხი არ იცის, - ამის შესახებ „ჯეოქეისის“ თავმჯდომარემ, ვიქტორ ყიფიანმა „პალიტრანიუსის” გადაცემა „360 გრადუსში“ განაცხადა.

„პირადად ჩემთვის გაუგებარია ასეთი ცნებები, როგორიცაა - მშვიდობიანი დამხობა და ა.შ. გაუგებარია, როგორ ხდება გადაბარება, როგორია პროცესის ტექნიკური მხარე. ახლა მოლოდინები და თამასა იმდენად მაღლაა აწეული, რომ ხვალ აუცილებელია ხალხმრავლობა. დასკვნითი ნაწილი ჩვენთვის გაუგებარია და ამასთან დაკავშირებით სიცხადე პრაქტიკულად ნულოვანია. ვის შვილს, ვისი დედა აიყვანს, ამ კითხვაზე კაციშვილმა პასუხი არ იცის.

ხვალ თუ ქართული საზოგადოების იმ ნაწილმა, ვინც თვლის, რომ ასე გაგრძელება არის შეუძლებელი და ქვეყანა საჭიროებს ცვლილებებს, მან თუ თავისი ნება არ გამოხატა აშკარა და ღია ფორმით, რა თქმა უნდა, ეს იქნება ძალიან დიდი საჩუქარი მავნე პროპაგანდისტული მანქანისათვის და მნიშვნელოვანი დარტყმა იქნება წინააღმდეგობის მოძრაობისათვის. ეს არის პროგრამა მინიმუმი - რაც შეიძლება მეტი ადამიანი, მეტი ხალხი, მეტი მობილიზება და მეტი კონსოლიდაცია.

პოლიტიკაში, მაგალითად სენტიმენტალიზაციაზე, მითოლოგიზაციაზე, პერსონიფიკაციაზე, ასევე არსებითია, უარი ვთქვათ თარიღების საკრალიზაციაზე. მე გამიკვირდება, რომ ერთ დღეში, ამ 24 საათიან მონაკვეთში მოხდეს ის, რაც ამ სენტიმენტალიზაციას და მითოლოგიზაციას უკავშირდება. ალბათ, ხვალინდელი დღე გარკვეული პროცესის დასაწყისი უნდა იყოს“, - განაცხადა ვიქტორ ყიფიანმა.