როგორი განცხადებაც არ უნდა გაკეთდეს ჩვენი ოპონენტებისგან, თუ ის არ იქნება ობიექტური, ქართულ საზოგადოებას მასზე როგორც წესი, რეაქცია არ აქვს,- ამის შესახებ „ქართული ოცნების“ საპატიო თავმჯდომარემ, ბიძინა ივანიშვილმა არჩევნებზე საკუთარი ხმის დაფიქსირების შემდგომ ჟურნალისტებს განუცხადა.

ბიძინა ივანიშვილი იმედს გამოთქვამს, რომ საზოგადოება დღევანდელ არჩევნებზეც აქტიური იქნება.

„სამოქალაქო საზოგადოების განვითარება, რომელიც ჩვენმა საზოგადოებამ მოახერხა და მაქსიმალურად აიღო ხელისუფლება ხელში, სწორედ, არჩევნებში სწორი პოზიციის დაფიქსირებით გამოიხატება. ამით ჩვენ მივიღეთ ის, რაც დღეს გვაქვს. წარმატება გვაქვს ყველა მიმართულებით. როგორი განცხადებაც არ უნდა გაკეთდეს დღეს ჩვენი ოპონენტებისგან, თუ ის არ იქნება ობიექტური, ქართულ საზოგადოებას მასზე როგორც წესი, რეაქცია არ აქვს. ეს არის ყველაზე დიდი მიღწევა საზოგადოებისთვის, რომ მან მოახერხა და ისწავლა თეთრის შავისგან გარჩევა. იმედია, საზოგადოება დღესაც იქნება აქტიური, მაქსიმალურად მობილიზებულები მივლენ საარჩევნო ყუთებთან და სწორ არჩევანს გააკეთებენ“, - განაცხადა ბიძინა ივანიშვილმა.