ორბელიანის მოედანზე ამ დროისთვის აქციის მონაწილეები აღარ იმყოფებიან. მათ ტერიტორია ცოტა ხნის წინ დატოვეს.

ადგილზე რჩება სპეცდანიშნულების რაზმი.

ორბელიანის მოედანზე აქციის მონაწილეებსა და სპეცრაზმს შორის ვითარება დღეს რამდენჯერმე დაიძაბა. სპეცრაზმმა მათ წინააღმდეგ გამოიყენა ე.წ. გაზის კაფსულები და წყლის ჭავლი. ადგილზე მოქალაქეებმა ბარიკადების სახით განალაგეს სხვადასხვა ნივთები - სკამები და მაგიდები. ასევე, დაწვეს ადგილზე არსებული ინვენტარი.

ვითარება ორბელიანის მოედანზე, კერძოდ, ათონელის საპრეზიდენტო სასახლესთან მას შემდეგ დაიძაბა, რაც თავისუფლების მოედანზე აქციის ორგანიზატორებმა მოქალაქეებს მოუწოდეს, ათონელის ქუჩაზე გადაენაცვლებინათ. კერძოდ, სცენიდან "ერთიანი ნაციონალური მოძრაობის“ წევრმა, მურთაზ ზოდელავამ შეკრებილებს განუცხადა, რომ „მამაკაცური ძალა დაიწყებს მოქმედებას და ჩაიბარებს პრეზიდენტის სასახლის გასაღებს“. მისი განცხადების შემდეგ, რამდენიმე მომიტინგემ საპრეზიდენტო სასახლის ღობე შეანგრიეს, რასაც სპეციალური დანიშნულების რაზმთან დაპირისპირება მოჰყვა.