როგორც ერთ-ერთ ლიტერატურულ ნაწარმოებშია, ეს იყო „ხმამაღლა წაკითხული გადატრიალების მცდელობა“, მეტი არაფერი - რაც შეეხება გამიჯვნას, ეს არის უბრალოდ პასუხისმგებლობისგან გაქცევა. ასეა ხოლმე, როდესაც გემი იძირება, მერე ყველა ცდილობს, თავის თავს უშველოს, - ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა ჟურნალისტებთან განაცხადა.

მისივე თქმით, 4 ოქტომბერი არ იყო სპონტანური პროცესი და აქციაზე მისული ნებისმიერი პიროვნება ხელისუფლების დამხობის მსურველი იყო.

„ეს იყო მათი გადმოსახედიდან დიადი მიზნით შესრულებული, მაგრამ უფხოდ და უნიათოდ შესრულებული, როგორც ერთ-ერთ ლიტერატურულ ნაწარმოებშია „ხმამაღლა წაკითხული გადატრიალების მცდელობა", მეტი არაფერი. ჩვენ ვეუბნებოდით მოსახლეობას, რომ 4 ოქტომბერი ჩაივლიდა მშვიდად, წყნარად სახელმწიფოებრივი თვალსაზრისით. ასეც მოხდა. 4 ოქტომბრის არჩევნებმა ჩაიარა მშვიდობიან გარემოში, ხოლო მათთვის, ვინც სცადა მშვიდობიანი გარემოს პროცესში შფოთის შემოტანა, რა თქმა უნდა, ვერ დასრულდებოდა 4 ოქტომბერი მშვიდობიანად. შემდგომ დღეებს ზოგიერთი მათგანი პენიტენციურ დაწესებულებაში გაატარებს.

4 ოქტომბერი არ იყო სპონტანური პროცესი. რამდენიმე თვის განმავლობაში შეგნებულად, წინასწარ აანონსებდნენ და ეძახდნენ მათ მხარდამჭერებს ამ აქციაზე, რომელიც წინასწარ დაანონსებული სახელმწიფო ხელისუფლების დამხობის აქცია იყო. ამიტომ იქ მისული ნებისმიერი პიროვნება, რა თქმა უნდა, მონაწილე და მსურველი იყო ხელისუფლების დამხობის პროცესის. შემდგომი მოვლენები, რაც განვითარდა, გამიჯვნა რომ დაიწყეს, ეს არის უბრალოდ პასუხისმგებლობისგან გაქცევა. ასეა ხოლმე, როდესაც გემი იძირება, მერე ყველა ცდილობს, თავის თავს უშველოს. ახლა გამოდის ისე, რომ თითქოს, მარტო პაატა ბურჭულაძე, პაატა მანჯგალაძე და სხვები არიან ამ პროცესში დამნაშავეები. რა თქმა უნდა, არა. ყველას აქვს თავისი წილი“, - განაცხადა მახაშვილმა.