არასდროს დავივიწყებთ „ჰამასის“ 7 ოქტომბრის თავდასხმების საშინელებას და იმ ტკივილს, რაც მათ უდანაშაულო მსხვერპლებს, მათ ოჯახებს და მთელ ისრაელელ ხალხს ორი წლის წინ მიაყნეს - პატივს ვცემთ მათ ხსოვნას მშვიდობისთვის დაუღალავი მუშაობით, - ამის შესახებ ევროკომისიის პრეზიდენტი, ურსულა ფონ დერ ლაიენი სოციალურ პლატფორმა X-ზე წერს.

მისი თქმით, ყველა მძევლის დაუყოვნებლივ გათავისუფლება და ცეცხლის შეწყვეტა ახლა რეალურია და ამ შესაძლებლობის ხელიდან გაშვება არ შეიძლება.

„მოვუწოდებთ ყველა მხარეს, კონსტრუქციულად ჩაერთონ შარმ-ელ-შეიხში მიმდინარე მოლაპარაკებებში, აშშ-ის პრეზიდენტის მიერ წარმოდგენილი გეგმის კონტექსტში. აუცილებელია ამ მომენტის გამოყენება გზის გასაკვალად რეგიონში მდგრადი მშვიდობისთვის, რომელიც დაფუძნებული იქნება კონფლიქტის ორი სახელმწიფოს პრინციპით გადაწყვეტაზე“, - აცხადებს ევროკომისიის პრეზიდენტი.

შეგახსენებთ, 2023 წლის 7 ოქტომბერს, გამთენიისას, ისრაელში, ღაზას საზღვართან მდებარე რეიმის რაიონში, ნოვას მუსიკალური ფესტივალის მიმდინარეობისას „ჰამასის“ წევრები ტერიტორიაზე შეიჭრნენ. თავდასხმის შედეგად 378 ადამიანი დაიღუპა, ათობით ადამიანი კი მძევლად აიყვანეს და ღაზას ტერიტორიაზე გადაიყვანეს.