წარმოუდგენელი უპასუხისმგებლობაა, განვითარებული, ცივილიზებული ქვეყნის წარმომადგენელი იყო და ვანდალიზმზე, ანტისახელმწიფოებრივ და ანტიკონსტიტუციურ მოქმედებებზე რეაგირება არ გქონდეს - ამის საპირისპიროდ, მთელი ამ პერიოდის მანძილზე რიგი დიპლომატი და უცხოელი აქტორი ამ ყველაფერს ახალისებდა და მხარდაჭერას უცხადებდა, - ამის შესახებ პარლამენტის ვიცე-სპიკერმა ნინო წილოსანმა განაცხადა.

წილოსანი იმასაც ამბობს, „ადრე თუ გვიან ამ მოცემულობას ბოლო მოეღება“.

„არ მჯერა, რომ მათ რომელიმე ქვეყანაში ამის მეასედი მოხდეს და მკაცრი, შეუბრალებელი და შეუწყალებელი დამოკიდებულება არ ჰქონდეთ. ჩვენი ქვეყნის შემთხვევაში ისინი ამ ყველაფერს ახალისებენ.

იმის მიუხედავად, რომ ბრიუსელის ბიუროკრატია სავალალო მდგომარეობაშია და ჩიხშია შესული, არ შეიძლება ეს დიდი ხანი გაგრძელდეს. არ შეიძლება ბრიუსელის რიგი წარმომადგენლები სხვა ქვეყნებში რევოლუციურ სცენარებს იწონებდნენ. ადრე თუ გვიან ამ მოცემულობას ბოლო მოეღება. მეგობრულ, პარტნიორულ დემოკრატიულ ფორმატში ურთიერთობებზე გადავლენ, როცა ამ ქვეყნის სუვერენიტეტს, მოსახლეობის არჩევანს და ხელისუფლებას აღიარებენ, რომელიც ამ ქვეყნის აბსოლუტურმა უმრავლესობამ აირჩია“, - განაცხადა ნინო წილოსანმა.