რუსთაველის გამზირზე პოლიციამ საპროტესტო აქციის მონაწილეებს გზის სავალი ნაწილის გათავისუფლებისკენ მოუწოდა, საპასუხოდ კი მომიტინგეების ნაწილმა, რომელსაც ტროტუარი ეკავა, გზაზე გადაინაცვლა.

მანამდე, რუსთაველის გამზირზე რამდენჯერმე მოხდა დაპირისპირება.

კერძოდ, დაპირისპირება, ძირითადად, უკმაყოფილო მძღოლებსა და აქციის მონაწილეებს შორის ხდებოდა. მძღოლები უკმაყოფილებას გამოთქვამდნენ იმის გამო, რომ რუსთაველის გამზირი გადაკეტილი იყო.

რამდენიმე წუთის წინ ადგილზე საპატრულო პოლიციის მანქანები გამოჩნდნენ. პოლიცია მოქალაქეებს მოუწოდებდა, გაეთავისუფლებინათ გზის სავალი ნაწილი, რადგან გზის გადაკეტვისთვის საკმარისი რაოდენობით არ იყვნენ.

საპასუხოდ ტროტუარზე მყოფი მომიტინგეებიც გზის სავალ ნაწილზე გადავიდნენ.

ისმოდა შეძახილები: წადი, წადი“, რის შემდეგაც პოლიციამ ტერიტორია დატოვა, რასაც მოქალაქეები შეძახილებით შეხვდნენ.