4 ოქტომბერს, თბილისში განვითარებულ მოვლენებთან დაკავშირებით დაკავებულ სამოქალაქო აქტივისტს, ნანა სანდერს ადვოკატები დღეს მოინახულებენ.

როგორც „ინტერპრესნიუსს“ მისმა ერთ-ერთმა უფლებადამცველმა აიჰან ჰასანლიმ განუცხადა, სანდერი ზაჰესის დროებითი მოთავსების იზოლატორშია გადაყვანილი. რაც შეეხება იმას, თუ რას ედავებიან დაკავებულ აქტივისტს, ადვოკატისთვის ამ ეტაპისთვის უცნობია.

„ჯერ არ შევსულვარ, შინაგან საქმეთა სამინისტროს ოფიციალური განცხადებით გავიგეთ მისი დაკავების შესახებ. დღეს ვაპირებ იზოლატორში მოვინახულო. 4 ოქტომბრის მოვლენების ფაქტზეა დაკავებული, მოგეხსენებათ, გამოძიება 4 მუხლით მიმდინარეობს, თუმცა, უშუალოდ რას ედავებიან, ამ ეტაპისთვის ინფორმაციას არ ვფლობთ“, - განაცხადა ჰასანლიმ.

ცნობისთვის, ათონელის სასახლესთან განვითარებულ მოვლენებში მონაწილე პირების მიმართ გამოძიება სისხლის სამართლის კოდექსის 317-ე, 222-ე, 225-ე და 187-ე მუხლებით მიმდინარეობს.

აღნიშნული გამოძიების ფარგლებში 23 ადამიანი დააკავეს, მათ შორის, 18 სამოქალაქო აქტივისტია, 5-ს კი მათ შორის, აქციის ორგანიზატორობა ედება ბრალად. შსს-ს ცნობით, 3 პირი მიმალვაში იმყოფება.