ადამიანები გაწირეს ციხისთვის, ძირითადად რიგითი აქტივისტები, თუმცა ლიდერებიც და ახლა ზოგი მიმალულია, ზოგი გაურბის პასუხისმგებლობის აღებას იმ აქციაზე, რომლის დაანონსების თანამონაწილეებიც იყვნენ და ზოგი საერთოდ დასასვენებლად წავიდა, - ამის შესახებ პრემიერ-მინისტრმა სოფო ჯაფარიძის საზღვარგარეთ გამგზავრებასთან დაკავშირებით დასმული კითხვის პასუხად განუცხადა.

მისივე თქმით, სოფო ჯაფარიძის გამგზავრებაც მეტყველებს „რადიკალი ოპოზიციონერების“ სახეზე.

„ისინი არიან უცხოელი აგენტები, შესაბამისად, მორალი არ აქვთ, ერთადერთი, რითაც მოქმედებენ, ეს არის გარე დავალებები და გარე პატრონის კარნახი,"- განაცხადა ირაკლი კობახიძემ.

ამასთან, პრემიერის თქმით, მორალური პასუხისმგებლობა იმ ყველაფერზე, რაც მოხდა 4 ოქტომბერს, ეკისრება უკლებლივ ყველა ადამიანს, რომელიც იყო მისული აქციაზე.

„ანონსი ყველამ იცის, რაც იყო. გამოცხადებული იყო დამხობის აქცია. დაახლოებით 5-7 ათასი ადამიანი მივიდა დამხობის აქციაზე სრულიად შეგნებულად. რა თქმა უნდა, მორალური პასუხისმგებლობა იმ ყველაფერზე, რაც მოხდა 4 ოქტომბერს, ეკისრება უკლებლივ ყველა ადამიანს, რომელიც იქ იყო მისული. რაც შეეხება სამართლებრივ პასუხისმგებლობას, ვინც ძალადობაში იყო ჩართული, იცით, რომ მათ მიმართ მოქმედებს სამართლებრივი ზომები. იდენტიფიცირებულია ადამიანების გარკვეული რაოდენობა და მათ მიმართ სამართლებრივი ზომები ამოქმედდება. რა თქმა უნდა, ეს არ გვიხარია, თუმცა ყველამ იხილა შემდგარი დანაშაული და ამაზე სახელმწიფოს რეაგირება არის უბრალოდ ჩვენი პასუხისმგებლობა", - განაცხადა პრემიერ-მინისტრმა.

რაც შეეხება ზოგადად პროტესტს, მისი თქმით, ხელოვნურ პროტესტის მცდელობას წარმატება ვერ ექნება.

„საქართველოში არავითარი საპროტესტო მუხტი არ არსებობს, არის 500 უცხოელი აგენტი, რომელთა მეშვეობითაც ცდილობენ, რომ რაღაც ნაკვერჩხალი შეინახონ. სინამდვილეში საზოგადოებაში არავითარი პროტესტი არ არსებობს, ამას ადასტურებს ისიც, რომ ამ არჩევნებში „ქართულმა ოცნებამ“ ამომრჩეველთა ხმების 82% მიიღო. ჩვენ 1 100 000 მეტი ხმა მივიღეთ.

რა თქმა უნდა, ასეთ ვითარებაში, ხელოვნურ პროტესტის მცდელობას წარმატების პერსპექტივა ვერ ექნება“,- განაცხადა ირაკლი კობახიძემ.