რა თქმა უნდა, მივესალმები, თუ ეუთო-ს თავმჯდომარე საქართველოში ჩამოვა - არჩევნები რომ მორჩა და რევოლუციამ ვერ გაიმარჯვა, მეორედ მოსვლა დაიწყო?! არ დაწყებულა, ცხოვრება გრძელდება და ჩამოვიდეს, - ამის შესახებ „ქართული ოცნების“ დეპუტატმა, თენგიზ შარმანაშვილმა ეუთო-ს მოქმედი თავმჯდომარის, ელინა ვალტონენის საქართველოში ვიზიტთან დაკავშირებით განაცხადა.

მისივე თქმით, საქართველოს ხელისუფლება მიესალმება, ასევე, ნებისმიერი ევროპული ქვეყნის ლიდერს, რომელიც ფაქტებზე სასაუბროდ ჩამოვა და არა აღქმებზე.

„მივესალმები, რა თქმა უნდა, თუ ის ჩამოვა საქართველოში და მივესალმებით ნებისმიერ ევრობიუროკრატს, ნებისმიერი ევროპული ქვეყნის ლიდერს, რომლებიც აქ ჩამოვლენ ფაქტებზე და არა აღქმებზე სასაუბროდ. ფაქტებზე სასაუბროდ ჩვენ დიდი ხანია მზად ვართ და ამას არასდროს გავურბივართ. არჩევნები რომ მორჩა და რევოლუციამ რომ ვერ გაიმარჯვა, მეორედ მოსვლა დაიწყო?! არ დაწყებულა, რა თქმა უნდა. ცხოვრება გრძელდება და ჩამოვიდეს. მომავალშიც ჩამოვა და სხვა ქვეყნების წარმომადგენლებიც ჩამოვლენ,“ - განაცხადა შარმანაშვილმა.

გარდა ამისა, მან აღნიშნა, რომ სრულად ეთანხმება საქართველოს პარლამენტის თავმჯდომარის, შალვა პაპუაშვილის განცხადებას, რომ “ვიდრე ბრიუსელი არ დაგმობს და გაემიჯნება მისგან მხარდაჭერილი ჯგუფების მიერ საქართველოს პრეზიდენტის სასახლის ძალადობრივ შტურმს, ის დარჩება ექსტრემიზმის მხარდამჭერად“.

„ერთ სიტყვასაც კი არ გადავანაცვლებდი, ისე მოვაწერდი ხელს ამ ფრაზას. 100%-ით ვეთანხმები, იმიტომ, რომ მართლაც ასეა. ვიდრე ევროპული ქვეყნების ხელმძღვანელები არ გაემიჯნებიან, ისინი ირიბად და პირდაპირ, თანამონაწილე არიან სახელმწიფოს გადატრიალების მცდელობის“, - აღნიშნა შარმანაშვილმა.

ცნობისთვის, „ევროპის უსაფრთხოებისა და თანამშრომლობის ორგანიზაციის“ განცხადებით, ეუთო-ს მოქმედი თავმჯდომარე, ფინეთის საგარეო საქმეთა მინისტრი ელინა ვალტონენი 13-15 ოქტომბერს აზერბაიჯანს, სომხეთსა და საქართველოს ეწვევა. გავრცელებული ცნობით, ვიზიტის ფარგლებში ეუთო-ს მოქმედი თავმჯდომარე მთავრობის მაღალი დონის წარმომადგენლებთან შეხვედრებს გამართავს.