მალე რუსეთის ენერგეტიკული, ფინანსური და სავაჭრო შემოსავლების წინააღმდეგ ახალ ზომებს მივიღებთ, - ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა კიევში, უკრაინის საგარეო საქმეთა მინისტრთან, ანდრეი სიბიგასთან ერთად გამართულ პრესკონფერენციაზე განაცხადა.

„რუსეთის საომარი ეკონომიკა უკვე დასუსტებულია, ჩვენ მას კიდევ უფრო დავასუსტებთ. ინფლაცია 20%-ზე მეტია, ფულადი რეზერვები ამოწურულია, ხოლო ზრდა ნულთან ახლოს არის. შესაძლოა, დრო ოდესღაც რუსეთის მხარეს იყო, მაგრამ ახლა ის უკრაინის მხარეს გადადის. როგორც პრეზიდენტმა ტრამპმა განაცხადა, უკრაინას შეუძლია ბრძოლის ველზე სიტუაცია რუსეთის წინააღმდეგ შეცვალოს. რუსეთის საზაფხულო თავდასხმითი იერიში წარუმატებელი აღმოჩნდა“, - განაცხადა კალასმა.

ამასთან, მისი თქმით, მიმდინარე კვირაში, ევროკომისიის პრეზიდენტთან, ურსულა ფონ დერ ლაიენთან ერთად ევროპის თავდაცვის გეგმას წარადგენს.

„ევროპა ჰიბრიდული თავდასხმების წინაშე დგას. ყოველ ჯერზე, როდესაც რუსული დრონი ან თვითმფრინავი ჩვენს საჰაერო სივრცეს არღვევს, ესკალაციის რისკი არსებობს. ევროპის ეკონომიკური სიძლიერე სამხედრო შეკავების ძალად უნდა გარდავქმნათ. ნათელია, რომ რუსეთის წინააღმდეგ ჩვენი თავდაცვა უნდა გავაძლიეროთ“, - აღნიშნა კალასმა.