ვულოცავ თავისუფლებისთვის მებრძოლ დაკავებულ ჟურნალისტებს, მზია ამაღლობელსა და ანდჟეი პოჩობუტს, - ამის შესახებ ევროპარლამენტში საქართველოს საკითხზე მომხსენებელი, ევროპარლამენტარი რასა იუკნევიჩიენე X-ზე წერს.

„ვულოცავ სახაროვის პრემიის ფინალისტთა სიაში შესულ თავისუფლებისთვის მებრძოლ დაკავებულ ჟურნალისტებს, მზია ამაღლობელსა და ანდჟეი პოჩობუტს, რომლებიც „ევროპის სახალხო პარტიის“ ჯგუფმა (EPPGroup) წარადგინა. ისინი ერთი და იმავე ბრძოლის ორ ფრონტზე დგანან: სიმართლისთვის, ღირსებისა და გამოხატვის თავისუფლებისთვის კრემლის მიერ მხარდაჭერილი ტირანიის წინააღმდეგ“, - წერს რასა იუკნევიჩიენე.

შეგახსენებთ, დღეს ევროპარლამენტის საგარეო საქმეთა და განვითარების კომიტეტების წევრებმა სახაროვის პრემიის სამი ფინალისტი დაასახელეს. კომიტეტის წევრებმა ფინალისტთა სიაში „ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი ბელარუსში დაკავებულ ჟურნალისტთან, ანდჟეი პოჩობუტთან ერთად წარადგინეს.