ნავთობის იმპორტთან დაკავშირებით ჩვენს პრიორიტეტს ინდოელი მომხმარებლების ინტერესების დაცვა წარმოადგენს, - ამის შესახებ ინდოეთის საგარეო საქმეთა სამინისტროს წარმომადგენელმა, რანდჰირ ჯაისვალმა განაცხადა.

„სტაბილური ფასების უზრუნველყოფა და მომარაგების უსაფრთხოება ჩვენი ენერგეტიკული პოლიტიკის ორი მთავარი მიზანია. ეს ბაზრის პირობების შესაბამისად დივერსიფიკაციას გულისხმობს“, - განაცხადა ჯაისვალმა.

კითხვაზე, შესაძლებელია თუ არა, რომ ენერგორესურსების იმპორტი აშშ-დან განხორციელდეს, ჯაისვალმა უპასუხა, რომ „ინდოეთი ენერგომომარაგების წყაროების გაფართოებას უკვე მრავალი წელია ცდილობს“.

„ეს პროცესი ბოლო ათწლეულის განმავლობაში მიმდინარეობს. ამჟამინდელმა ადმინისტრაციამ ენერგეტიკული თანამშრომლობის გაღრმავების ინტერესი გამოხატა. ამის შესახებ მოლაპარაკებები მიმდინარეობს“, - აღნიშნა ინდოეთის საგარეო საქმეთა სამინისტროს წარმომადგენელმა.

ცნობისთვის, აშშ-ის პრეზიდენტის, დონალდ ტრამპის განცხადებით, „ინდოეთის პრემიერ-მინისტრმა, ნარენდრა მოდიმ დაარწმუნა, რომ რუსულ ნავთობს აღარ შეიძენს“.

„არ მახარებდა, რომ ინდოეთი [რუსულ] ნავთობს ყიდულობდა და მან [ნარენდრა მოდიმ] დღეს დამარწმუნა, რომ რუსეთისგან ნავთობს არ იყიდიან. ეს დიდი მუხრუჭია. ახლა ჩინეთი უნდა ვაიძულოთ, იგივე გააკეთოს“, - აღნიშნა დონალდ ტრამპმა.