საქართველოს ტექნიკური უნივერსიტეტის კონკრეტული ინფრასტრუქტურა პრეზიდენტის ოჯახის წევრს ერთ ლარად გადაეცა, რაც არის აბსოლუტურად ღია თავხედობა, ყველაფერს რომ თავი დავანებოთ, - ამის შესახებ პრემიერ-მინისტრმა, ირაკლი კობახიძემ ჟურნალისტებს განუცხადა.

მისი თქმით, საინტერესო იქნება საქართველოს უნივერსიტეტის ირგვლივ განვითარებული მოვლენებისა და საკითხის შესწავლა.

„ზოგადად, ყველამ ძალიან კარგად იცის რაც მოხდა ამ უნივერსიტეტთან დაკავშირებით. საქართველოს ტექნიკური უნივერსიტეტის კონკრეტული ინფრასტრუქტურა გადაეცა ერთ ლარად პრეზიდენტის ოჯახის წევრს, რაც არის აბსოლუტურად ღია თავხედობა, ყველაფერს რომ თავი დავანებოთ. რა თქმა უნდა, საინტერესო იქნება ამ საკითხის შესწავლა, დანარჩენი დაველოდოთ შესაბამისი უწყებების პასუხს“, - განაცხადა კობახიძემ.

ცნობისთვის, საქართველოს ტექნიკური უნივერსიტეტის რექტორმა, აკადემიკოსმა დავით გურგენიძემ საქართველოს პროკურატურას განცხადებით მიმართა. დავით გურგენიძის განმარტებით, უნივერსიტეტი პროკურატურისგან ითხოვს, რომ ქონება, რომელიც მისი თქმით, საქართველოს მესამე პრეზიდენტის ოჯახის მხრიდან მიტაცებული იქნა, დაყადაღდეს და შემდგომ კვლავ ტექნიკურ უნივერსიტეტს დაუბრუნდეს.