ლოჯისტიკურად რთული იქნება, თუმცა შესაძლებელი რომ იყოს, იმ მილიონ 107 ათას ამომრჩეველს დავაყენებდით ქალბატონი კოსის სახლთან და მოესმინა მათი ხმისთვის,- ასე უპასუხა საქართველოს პარლამენტის თავმჯდომარემ შალვა პაპუაშვილმა ევროკომისარს გაფართოების საკითხებში მარტა კოსს, რომელმაც აღნიშნა, რომ საქართველოს მთავრობა არ უსმენს საკუთარ ხალხს და არ სურს ევროპული გზით სიარული.

პაპუაშვილის თქმით, როგორც ჩანს ევროკომისარი მარტა კოსი სელექციურად უყურებს საქართველოს და ქართველ ხალხს მხოლოდ მათ უწოდებს, ვისაც თავადვე აფინანსებს.

„როგორც ჩანს, ქალბატონი კოსი სელექციურად უდგება საქართველოს, მისთვის ქართველი ხალხი თუ არიან მხოლოდ ის ხალხი, ვისაც ისინი ფულს უხდიან, ეს ძალიან მძიმე ყოფილა. დღემდე ქალბატონ კოსს არ დაუგმია პრეზიდენტის სასახლეზე ძალადობრივი შტურმი, მათ შორის, იმ ხალხის მხრიდან, რომლებსაც აფინანსებს ევროკავშირი. მანამ, სანამ ქალბატონი კოსი და სხვა ბიუროკრატები ბრიუსელიდან არ დაგმობენ პრეზიდენტის სასახლეზე ძალადობრივ შტურმს, მანამ, სანამ არ გაემიჯნებიან ძალადობრივ შტურმს, მანამ, სანამ არ შეწყვეტენ ამ მოძალადეების დაფინანსებასა და თავზე ხელის გადასმას, მანამდე, რა თქმა უნდა, ასეთი განცხადებები მხოლოდ ფარისევლობაა და სხვა არაფერი“, - განაცხადა პაპუაშვილმა.

ცნობისთვის, გაფართოების საკითხებში ევროკომისრის, მარტა კოსის განცხადებით, საქართველოს მთავრობა არ უსმენს საკუთარ ხალხს და არ სურს ევროპული გზით სიარული. მისივე თქმით, ევროკავშირის საგარეო საქმეთა საბჭოს დღევანდელ შეხვედრაზე, რომელიც ლუქსემბურგში იმართება, განხილული იქნება „საქართველოში მიმდინარე შემაშფოთებელ მოვლენები“.

„საქართველოს მოსახლეობამ ბოლო სამ არჩევნებში, მიმდინარე საპროტესტო აქციებში აჩვენა, ასევე გამოკითხვებიც აჩვენებს, რომ მათ ევროპული მომავალი სურთ, მაგრამ არა მთავრობას. როგორც ჩანს, მათი მთავრობა არ უსმენს საკუთარ ხალხს და არ სურს ევროპული გზით სიარული. ოპონენტები, როგორც იცით, დაპატიმრებულები არიან, ჟურნალისტებისა და სამოქალაქო საზოგადოების ორგანიზაციების ხმას კი ახშობენ“, - აღნიშნა ევროკომისარმა.