აშშ-ის პრეზიდენტ დონალდ ტრამპის სპეციალური წარმომადგენელი სტივ უიტკოფი და მრჩეველი და სიძე ჯარედ კუშნერი ისრაელში ჩავიდნენ, - ინფორმაციას მედია საშუალებები აშშ-ის საელჩოს პრესსპიკერზე დაყრდნობით ავრცელებენ.

მათივე ინფორმაციით, უიტკოფი და კუშნერი ღაზის სექტორში ცეცხლის შეწყვეტის შესახებ შეთანხმების შესრულებას ადევნებენ თვალყურს, რომლის მისაღწევად შუამავლობაში თავადაც მონაწილეობდნენ.

მოსალოდნელია, რომ უიტკოფი და კუშნერი ბენიამინ ნეთანიაჰუს მთავრობის წევრებს შეხვდებიან.

აშშ-ის ვიცე-პრეზიდენტმა ჯეი დი ვენსმა გუშინ განაცხადა, რომ შესაძლოა, ისრაელს უახლოეს დღეებში ეწვიოს იმის გასარკვევად, თუ „როგორ მიდის საქმეები“.

ისრაელის მედია იუწყება, რომ ვიზიტის ფარგლებში ჯეი დი ვენსი ბენიამინ ნეთანიაჰუსთან შეხვედრას გამართავს.