კრამატორსკში რუსული დრონით დარტყმის შედეგად ორი უკრაინელი ჟურნალისტი დაიღუპა, - ინფორმაციას უკრაინის პრეზიდენტი, ვოლოდიმირ ზელენსკი ავრცელებს.

„დღეს კრამატორსკში რუსულმა დრონმა პირდაპირ დაარტყა უკრაინული Freedom TV-ის რეპორტიორების მანქანას, რის შედეგადაც, ჟურნალისტი ოლენა ჰუბანოვა და ოპერატორი ევგენი კარმაზინი დაიღუპა. ასევე, მძიმედ დაშავდა ჟურნალისტი ალექსანდრ კოლიჩევი“, - წერს ვოლოდიმირ ზელენსკი X-ზე.

მისი თქმით, „2022 წლიდან, რუსეთმა სრულმასშტაბიანი ომის განმავლობაში უკვე მედიის 135 წარმომადგენელი მოკლა“.

„ცოტა ხნის წინ, რუსული დრონით პირდაპირი დარტყმის შედეგად ფრანგი ფოტოჟურნალისტი ანტონი ლალიკანი დაიღუპა და მისი უკრაინელი კოლეგა, გეორგი ივანჩენკო დაშავდა. ეს ინციდენტები ან შეცდომები არ არის, ეს რუსეთის წინასწარგანზრახული სტრატეგიაა, რომ დამოუკიდებელი ხმები გააჩუმოს, რომლებიც უკრაინაში რუსეთის ომის დანაშაულების შესახებ აშუქებენ“, - აცხადებს უკრაინის პრეზიდენტი.