რაც უფრო მეტია რუსეთის ბრავადა, მით უფრო ცხადია, რომ ყველაფერი პირიქითაა. ამის შესახებ უკრაინის საგარეო საქმეთა მინისტრი, ანდრეი სიბიგა სოციალურ ქსელში წერს.

მისი თქმით, მიმდინარე კვირას მშვიდობისკენ იძულებისთვის რუსეთზე ზეწოლის ახალი ეტაპი აღინიშნა, ვინაიდან ევროკავშირმა ძლიერი სანქციების მე-19 პაკეტი შეათანხმა, რომელიც რუსეთის ენერგეტიკას, ჩრდილოვან ფლოტსა და სანქციების გვერდის ავლის გზებს ურტყამს. ასევე, პირველი სანქციები გამოიყენა ტრამპის ადმინისტრაციამაც, რომელმაც რუსეთის უდიდესი ნავთობკომპანიები - “როსნეფტი” და “ლუკოილი” დაასანქცირა.

“თვალსაჩინოა, რომ რუსები ეგრევე გაიქცნენ იმის მოსაყოლად, რომ სანქციები არ ადარდებთ. პუტინი ამბობს, რომ რუსეთის ეკონომიკას ყველაფერი კარგად აქვს. მისი პროპაგანდისტები მანტრებს იმეორებენ იმის თაობაზე, რომ სანქციები არაფერზე არ მოქმედებს. რაც უფრო მეტია ესეთი ბრავადა, მით უფრო ცხადია, რომ ყველაფერი დიამეტრალურად საპირისპიროდაა,” - წერს სიბიგა.

მისი თქმით, ტრამპის მეორე ვადის დროს რუსეთის წინააღმდეგ პირველი სანქციები “მნიშვნელოვან სტრატეგიულ ხაზს ავლებენ”, და რუსეთის ხელმძღვანელობას სამომავლოდ დასავლეთის სისუსტისა და აშშ-ის მოტყუების შესაძლებლობის იმედები უნდა გაუქრეს.

“რუსეთს მართლა ძალიან დიდი იმედი ჰქონდა წელს, რომ უკრაინა პარტნიორების მხარდაჭერას დაკარგავდა და იძულებული იქნებოდა რუსული პირობები მიეღო, რომლებიც ახლოსაა კაპიტულაციასთან. ეს ყველაფერი არ მოხდა,” - წერს სიბიგა.