ისრაელის პრემიერ-მინისტრის, ბენიამინ ნეთანიაჰუს განცხადებით, ისრაელი განსაზღვრავს, თუ რომელ უცხოურ ძალებს დაუშვებს ღაზაში საერთაშორისო ძალების შემადგენლობაში, რომლის მიზანი ცეცხლის შეწყვეტის პირობების დაცვის ხელშეწყობაა, - ინფორმაციას Reuters-ი ავრცელებს.

„ვაკონტროლებთ ჩვენს უსაფრთხოებას და ასევე ნათლად განვაცხადეთ საერთაშორისო ძალებთან დაკავშირებით, რომ ისრაელი განსაზღვრავს, რომელი ძალებია ჩვენთვის მიუღებელი და ასე ვმოქმედებთ და გავაგრძელებთ მოქმედებას. ეს, რა თქმა უნდა, მისაღებია შეერთებული შტატებისთვისაც, როგორც მისმა მაღალი რანგის წარმომადგენლებმა ბოლო დღეებში განაცხადეს“, - განაცხადა ნეთანიაჰუმ.

აშშ-ის პრეზიდენტ დონალდ ტრამპის ინიციატივით მიღწეული შეთანხმება ისრაელისა და „ჰამასის“ მხრიდან ცეცხლის შეწყვეტის შემდეგ ღაზაში საერთაშორისო ძალების შესვლას და უსაფრთხოების ზედამხედველობას ითვალისწინებს.

ტრამპის ადმინისტრაციამ ამერიკელი ჯარისკაცების ღაზას სექტორში გაგზავნა გამორიცხა და მოლაპარაკებებს აწარმოებენ ინდონეზიასთან, არაბთა გაერთიანებულ საემიროებთან, ეგვიპტესთან, კატართან, თურქეთთან და აზერბაიჯანთან მრავალეროვნულ ძალებში წვლილის შესატანად.

გასულ კვირას ნეთანიაჰუმ მიანიშნა, რომ ის წინააღმდეგი იქნება იმის, რომ თურქეთის უსაფრთხოების ძალებმა ღაზაში რაიმე როლი შეასრულონ.

აშშ-ის სახელმწიფო მდივანმა მარკო რუბიომ, რომელიც ისრაელში ვიზიტით იმყოფებოდა, პარასკევს განაცხადა, რომ საერთაშორისო ძალები უნდა შედგებოდნენ „იმ ქვეყნებისგან, რომლებთანაც ისრაელი კომფორტულად გრძნობს თავს“. მან თურქეთის ჩართულობაზე კომენტარი არ გააკეთა.