პარლამენტის თავმჯდომარის, შალვა პაპუაშვილის განცხადებით, ევროპის ლიბერალებისა და დემოკრატების ალიანსის (ALDE) მიერ საქართველოს შესახებ მიღებული რეზოლუცია საკუთარ თავზე გაცილებით მეტს ამბობს.

როგორც პაპუაშვილმა ჟურნალისტებს განუცხადა, ეს არის ის სამწუხარო გავლენა, რასაც საქართველოს ხელისუფლება ამჟამად ბრიუსელში ხედავს.

„ორგანიზაცია, რომლის წევრიც არიან „გირჩი“, „დროა“, „ლელო“ და მსგავსი პარტიები, რომლებიც საქართველოში ხელისუფლების დამხობას გეგმავდნენ და დემოკრატიაზე უარს ამბობენ, თავის თავზე მეტყველებს ეს ყველაფერი. მათ თვითმმართველობის არჩევნებს „ყალბი არჩევნები“ უწოდეს, რაც საინტერესოა. მათი წევრი პარტია „ლელო“ მონაწილეობდა ამ არჩევნებში, მანდატები მიიღო და ამ მანდატების გამოყენებასაც აპირებენ. რანაირად არის ყალბი არჩევნები, ეს კიდევ ცალკე საკითხია, თუმცა მე მეორე ასპექტი უფრო მენიშნა - „ალდეს“ ლიდერები არიან ქალბატონი კაია კალასი და ქალბატონი მარტა კოსი. გაფართოების კომისარი არის კოსი და საგარეო საკითხებში კომისარი კალასი. რამდენადაც ვნახეთ, ისინი მონაწილეობდნენ ამ კონგრესში. რა თქმა უნდა, აქ კითხვა ლეგიტიმური არის იმ მხრივ, თუ რასთან გვაქვს საქმე. ქალბატონი კალასი და კოსი ჩვენს თვითმმართველობის არჩევნებს ყალბ არჩევნებს უწოდებენ? ეს არის მათი განცხადება? მნიშვნელოვანია, ჩვენ ამ მხრივაც განმარტებები მოვისმინოთ, ვინაიდან ეს იქნებოდა თავდასხმა ქართულ დემოკრატიაზე“, - განაცხადა პაპუაშვილმა.

პარლამენტის თავმჯდომარის განმარტებით, „ალდეს“ რეზოლუციით ისინი მილიონ ნახევარ ამომრჩეველს, რომლებმაც არჩევნებში მონაწილეობა მიიღეს, განუცხადეს, რომ ისინი უბრალოდ არ არსებობენ.

„ალდეს“ პარტიისთვის მნიშვნელობა აქვს შუშანა მაცაბერიძეს, ის არის ხალხი და ჩვენ ვართ ნული. საქართველოს მილიონ ნახევარი მოქალაქე, რომელიც არჩევნებზე მივიდა, მათთვის ნული არის. არ ვარსებობთ, როგორც ხალხი. ჩვენ შევყურებთ ევროკავშირს, ბრიუსელს და ვხედავთ პირდაპირ საბჭოთა პერიოდს. ზუსტად ასე გვიყურებდნენ, როგორც არარსებულს, გაუქმებულ ხალხს და ქვეყანას, რომელიც ჩვენს სათქმელს ვერ ვიტყოდით“, - განაცხადა შალვა პაპუაშვილმა.