თურქეთმა დიდი ბრიტანეთისგან 20 ავიაგამანადგურებელი შეიძინა, - ინფორმაციას Reuters-ი დიდი ბრიტანეთის მთავრობის განცხადებაზე დაყრდნობით ავრცელებს.

დიდი ბრიტანეთის პრემიერ-მინისტრმა, კირ სტარმერმა ანკარაში, თურქეთის პრეზიდენტთან, რეჯეფ თაიფ ერდოღანთან შეხვედრაზე ხელი მოაწერა შეთანხმებას, რომლის მიხედვითაც თურქეთმა დიდი ბრიტანეთისგან 10.7 მილიარდი დოლარის ღირებულების Eurofighter Typhoon-ის ტიპის 20 ავიაგამანადგურებელი შეიძინა.

„ეს შეთანხმება ქვეყნის მასშტაბით 20 000 სამუშაო ადგილის შენარჩუნებას უზრუნველყოფს. შეთანხმება თურქეთის მოწინავე საბრძოლო შესაძლებლობებსა და მნიშვნელოვან რეგიონში ნატო-ს პოზიციებს გააძლიერებს, ასევე, ჩვენს საჰაერო ძალებს შორის ურთიერთთანამშრომლობას გააუმჯობესებს“, - ნათქვამია განცხადებაში.

სტარმერის შეფასებით, ანკარაში გაფორმებული შეთანხმება „ბრიტანელი მუშების, ბრიტანეთის თავდაცვის ინდუსტრიისა და ნატო-ს უსაფრთხოების გამარჯვებას წარმოადგენს“.