ინფრასტრუქტურის მინისტრის, რევაზ სოხაძის განცხადებით, „თეთრი სიის“ ახალ მოდელზე გადასვლით სახელმწიფო ფინანსურ რისკებს ამცირებს. ამის შესახებ მან პარლამენტში, ინტერპელაციის წესით მოსმენისას განაცხადა.

„საზოგადოებამ უკვე იცის, რომ დავიწყეთ სამშენებლო სექტორის წარმომადგენლებთან კონსულტაციები ე.წ. თეთრი სიის მექანიზმის განახლებისა და გაჯანსაღების მიმართულებით. საბოლოოდ, მივედით შეთანხმებამდე“, - განაცხადა სოხაძემ.

მინისტრის თქმით, „თეთრი სიის“ სისტემა თავდაპირველად ბიზნესის წასახალისებლად შეიქმნა, თუმცა დროთა განმავლობაში გადაიქცა მექანიზმად, რომელიც ცალკეულ კომპანიებს არასამართლიან უპირატესობას აძლევდა. როგორც მან აღნიშნა, დაფიქსირდა შემთხვევები, როდესაც კომპანიებმა მიიღეს საავანსო თანხები და ისინი სხვა მიზნებისთვის გამოიყენეს.

„დღეს უკვე შევჯერდით „თეთრი სიის“ ახალ მოდელზე, რომლის თანახმადაც: 2026 წელს, ხელშეკრულების შესრულების უზრუნველყოფის გარანტია განისაზღვრება 60%-ით; 2027 წელს – 70%-ით; 2028 წელს – 80%-ით; ხოლო 2029 წლიდან ამოქმედდება გადამუშავებული მოდელი, რომელიც მკაფიოდ განსაზღვრავს კრიტერიუმებს „თეთრ სიაში“ მოხვედრისთვის და შესაბამის პრეფერენციებს,“ - განაცხადა სოხაძემ.