ნიდერლანდებში ვადამდელი საპარლამენტო არჩევნების წინასწარი შედეგების თანახმად, ცენტრისტული პარტია „დემოკრატები 66“ და ულტრამემარჯვენე „თავისუფლების პარტია“ თანაბარი რაოდენობის მანდატებს მოიპოვებენ, - ინფორმაციას Reuters-ი ავრცელებს.

ნიდერლანდების ვადამდელ საპარლამენტო არჩევნებში ხმების 98%-ის დათვლის შედეგად, ცენტრისტული პარტია „დემოკრატები 66“ და ულტრამემარჯვენე ხეერტ ვილდერსის „თავისუფლების პარტია“ (PVV) 150 ადგილიან პარლამენტში თანაბარი რაოდენობის, 26-26 ადგილს მოიპოვებენ.

ამასთან, პარტია „თავისუფლებისა და დემოკრატიისთვის“ (VVD) 22 მანდატს მოიპოვებს, ხოლო „ქრისტიან-დემოკრატები“ 18 მანდატს მიიღებენ.

2023 წლის საპარლამენტო არჩევნების შედეგებთან შედარებით ხეერტ ვილდერსის პარტიამ მხარდაჭერა დაკარგა, ხოლო პარტია „დემოკრატები 66“-ის მანდატების რაოდენობა თითქმის სამჯერ გაიზარდა.

ვილდერსის განცხადებით, შედეგებით იმედგაცრუებულია და სავარაუდოდ, მომავალი მთავრობის შემადგენლობაში მისი პარტია არ იქნება.

„დემოკრატები 66“-ის ლიდერმა, 38 წლის რობ იეტენმა, რომელიც შესაძლოა, ნიდერლანდების ისტორიაში ყველაზე ახალგაზრდა და პირველი ღიად გეი პრემიერ-მინისტრი გახდეს, წინასწარი შედეგების გამოცხადების შემდეგ განაცხადა, რომ „ნიდერლანდებმა ისტორიის ახალი ფურცელი გადაშალა“.

„ჩვენ არა მხოლოდ ნიდერლანდებს, არამედ მსოფლიოს ვაჩვენეთ, რომ პოპულისტური და ულტრამემარჯვენე მოძრაობების დამარცხება შესაძლებელია“, - აღნიშნა რობ იეტენმა.

ცნობისთვის, ნიდერლანდების პარლამენტში მმართველი კოალიციის ფორმირებისთვის 76 ადგილია საჭირო.