მერამდენე შემთხვევაა, როდესაც ევროპარლამენტი ევრონესტის ძირითადი ღირებულებების, ძირითადი პრინციპების დარღვევით განაგრძობს მისი მეზობლების უპატივცემულობას ამ შემთხვევაში საქართველოსა და საქართველოს მოსახლეობის არჩევანის მიმართ,- ასე გამოეხმაურა პარლამენტის ევროინტეგრაციის კომიტეტის თავმჯდომარე ლევან მახაშვილი რეზოლუციას, რომელიც ევრონესტის საპარლამენტო ასამბლეაზე საქართველოსთან დაკავშირებით მიიღეს.

მახაშვილის განმარტებით, საქართველო ევრონესტის სესიებში მონაწილეობას იქამდე არ მიიღებს, სანამ არ იქნება შესაბამისი გარემო დიალოგისა, ურთიერთპატივისცემისთვის.

„ჩვენ არაერთხელ გავაფრთხილეთ, მოვუწოდეთ ევროპარლამენტარებს, რომ დაბრუნდებოდნენ ძირითადი პრინციპების პატივისცემას, თუმცა ისინი კვლავ განაგრძობენ საქართველოს არჩევანის უპატივცემულობას, შესაბამისად ჩვენ მივიღეთ გადაწყვეტილება, რომ სანამ არ იქნება შესაბამისი გარემო დიალოგისთვის, ურთიერთპატივისცემისთვის, რაც არის ძირითადი პრინციპები ევრონესტის საპარლამენტო ასამბლეის, ამ პერიოდამდე ჩვენ აღარ ვაპირებთ მონაწილეობის მიღებას ამ სესიებში. თუმცა, შესაბამისი გარემოს ჩამოყალიბების შემთხვევაში, ევროპარლამენტის მხრიდან პატივისცემის შემთხვევაში, ჩვენ, რა თქმა უნდა, დავუბრუნდებით ამ ასამბლეას. ასამბლეის მიღმა, ჩვენ, რა თქმა უნდა, ორმხრივ ფორმატებში ვაგრძელებთ ჩვენს მეზობლებთან, ჩვენს პარტნიორებთან და აღმოსავლეთ პარტნიორობის წევრს სახელმწიფოებთან საპარლამენტო ურთიერთობებს.“- განაცხადა მახაშვილმა.