რომ დაინახეს, ფიასკოთი დამთავრდა მათი ეს უგვანო პოლიტიკა, ახლა, ბუნებრივია, ეძებენ „განტევების ვაცებს“ - თუ [ალეკო ელისაშვილი] მაგ ლოგიკას გაჰყვება, ყველაზე დიდი რუსული სპეცოპერაცია იყო, როდესაც 2024 წლის 26 ოქტომბრის არჩევნები უკანონოდ გამოაცხადეს და თავის ამომრჩეველს მანდატები სახეში მიაყარეს, - ამის შესახებ „ქართული ოცნების" დეპუტატმა, ირაკლი ქადაგიშვილმა განაცხადა, რითაც თვითმმართველობის არჩევნებთან დაკავშირებით, „ლელო - ძლიერი საქართველოს" ერთ-ერთი ლიდერის, ალეკო ელისაშვილის განცხადებებს გამოეხმაურა.

მისივე თქმით, 26 ოქტომბრის საპარლამენტო არჩევნების უკანონოდ გამოცხადება და მანდატებზე უარის თქმა იყო „ყველაზე დიდი რუსული სპეცოპერაცია".

„რომ დაინახეს, ფიასკოთი დამთავრდა მათი ეს უგვანო პოლიტიკა, ახლა, ბუნებრივია, ეძებენ განტევების ვაცებს. საერთოდ, თუ მაგ ლოგიკას გაჰყვება, ყველაზე დიდი რუსული სპეცოპერაცია იყო, როდესაც 2024 წლის 26 ოქტომბრის არჩევნები უკანონოდ გამოაცხადეს და თავის ამომრჩეველს მანდატები სახეში მიაყარეს. ეს იყო ყველაზე დიდი უკანონობა და ყველაზე დიდი რუსული სპეცოპერაცია. ახლა გაყვეს და მოიკვლიოს იმ თავის პოლიტიკურ ლიდერებში, ვინც ეს გააკეთა, თურმე, რუსული სპეცოპერაციის აღმსრულებლები ყოფილან," - განაცხადა ქადაგიშვილმა.

ცნობისთვის, „ლელო-ძლიერი საქართველოს“ ერთ-ერთი ლიდერის, ალეკო ელისაშვილის განცხადებით, ოპოზიციის მიერ ადგილობრივი თვითმმართველობის არჩევნების ბოიკოტი რუსული სპეცოპერაცია იყო.

როგორც ელისაშვილმა „პალიტრანიუსის“ გადაცემა „360 გრადუსში“ განაცხადა, ოპოზიციამ ვერ მოახერხა, ამომრჩევლის დარწმუნება და რიგი სტრატეგიული შეცდომები დაუშვა.

მისი თქმით, არჩევნების ბოიკოტის იდეა მიზანმიმართულად იყო „შემოგდებული“.

„შეცდომებს აღიარება სჭირდება, არჩევნების ბოიკოტი შემოგდებული რუსული სპეცოპერაცია იყო - „ქართულ ოცნებას“ ახლაც მუხანათობა აქვს ჩაფიქრებული, არ აგვკრძალავენ, „ნაცმოძრაობისა“ და გვარამიას ხალხი კი ჩვენ დაგვიწყებს ლანძღვას," - განაცხადა ელისაშვილმა.