ივანიშვილის ანტიქართული რეჟიმი ასაიდუმლოებს ქართველი ხალხისთვის საფრთხის შემცველ ხელშეკრულებას, რომლის მიხედვითაც არაბული ორი ანკლავი შენდება თბილისსა და ბათუმში, - ამის შესახებ კოალიცია „ძლიერი საქართველო-ლელოს“ ერთ-ერთმა ლიდერმა, ირაკლი კუპრაძემ განაცხადა.

კუპრაძის თქმით, ეს ხელშეკრულება შეიცავს საქართველოს სახელმწიფოს წინააღმდეგ გადადგმულ ნაბიჯებს.

„ივანიშვილის „ანტიქართული ოცნება“ ბოლო წლების განმავლობაში გამჭვირვალობის არგუმენტით იჭერს, დევნის სამოქალაქო საზოგადოებას, აქტივისტებს, ჟურნალისტებს, მედიას. თითქოს გამჭვირვალობა მათთვის არის მნიშვნელოვანი და ღირებული, ამ დროს კი ივანიშვილის ანტიქართული რეჟიმი ასაიდუმლოებს ქართველი ხალხისთვის საფრთხის შემცველ ხელშეკრულებას, რომლის მიხედვითაც არაბული ორი ანკლავი შენდება თბილისსა და ბათუმში და 6,5 მილიარდ დოლარად შეფასებული ხელშეკრულება უნდა იყოს საიდუმლო ივანიშვილის პირობებში.

დარწმუნებით შემიძლია გითხრათ ზუსტად იმ დანაშაულებრივი ფარულობის გათვალისწინებით, რასაც ივანიშვილის ხელისუფლება აკეთებს, ეს ხელშეკრულება შეიცავს საქართველოს სახელმწიფოს წინააღმდეგ გადადგმულ ნაბიჯებს, ქართველი ხალხის წინააღმდეგ გადადგმულ ნაბიჯებს და მოვითხოვთ, რომ გასაჯაროვდეს ეს ხელშეკრულება.

ამდენი კვირის განმავლობაში ვითხოვთ ჯიუტად, სასამართლოშიც გავასაჩივრებთ, ყველა პირობებში მოვითხოვთ ამ ხელშეკრულების გასაჯაროებას და არ შევწყვეტთ ბრძოლას, სანამ არ ვამხელთ „ქართულ ოცნებას“ რეალურ, ანტიქართულ საბოტაჟში, რასაც აწარმოებს ქართველი ხალხისა და ქართული სახელმწიფოს წინააღმდეგ“, - განაცხადა ირაკლი კუპრაძემ.