ალექსანდრე ლუკაშენკომ საგარეო საქმეთა სამინისტროს საზღვარზე არსებული ვითარების ნორმალიზების მიზნით ლიეტუვასთან მოლაპარაკებების გამართვა დაავალა, - ინფორმაციას ბელარუსის სახელმწიფო საინფორმაციო სააგენტო „ბელტა“ ავრცელებს.

ბელარუსის პრეზიდენტის, ალექსანდრე ლუკაშენკოს პრესსამსახურის ცნობით, „ლიეტუვის ხელისუფლებისგან საზღვარზე არსებული ვითარების მოგვარების წინადადება მიიღეს“.

„ლიეტუვის მხარის მოთხოვნის გათვალისწინებით, პრეზიდენტმა ქვეყნის საგარეო საქმეთა სამინისტროს ხელმძღვანელს დაავალა, რომ საზღვარზე სიტუაციის ნორმალიზებისა და საკონტროლო პუნქტების სრული ფუნქციონირების აღდგენის მიზნით მოლაპარაკებებს ორგანიზება გაუწიოს“, - აცხადებს ლუკაშენკოს პრესსამსახური.

შეგახსენებთ, ბოლო რამდენიმე კვირის განმავლობაში საჰაერო ბუშტებთან დაკავშირებული ინციდენტების გამო ლიეტუვამ ბელარუსთან საზღვარი ერთი თვით დახურა.