ტრაგედიაა ქართული სახელმწიფოებრიობისთვის, რომ დღეს ეს ორგანიზაცია საქართველოს პოლიტიკურ ვითარებას დიქტატურის დამყარებად აფასებს - ეს ძალიან მაღალი დონის გზავნილია ე.წ. ხელისუფლებისთვის, რომ გონს მოეგოს ივანიშვილის რეჟიმი,- ასე ეხმაურება „ლელო-ძლიერი საქართველოს“ წევრი, თაზო დათუნაშვილი PACE-ს თანამომხსენებლების განცხადებას.

როგორ თაზო დათუნაშვილმა აღნიშნა, PACE-ს თანამომხსენებლების მოწოდებაში მთავარი აქცენტი გაკეთებულია იმაზე, რომ არ შეიძლება, დემოკრატიულ, ცივილიზებულ საზოგადოებაში ყველა ოპოზიციური ლიდერი ციხეში ან პოლიტიკური დევნის ქვეშ იყოს.

„ეს არის ორგანიზაცია, რომლის წევრიც საქართველო არის 1999 წლიდან. ამ ორგანიზაციაში მიიღეს შევარდნაძის დროინდელი საქართველო იმ იმედით, რომ ჩვენი დასავლელი პარტნიორები ამ ქვეყანაში ხედავდნენ უდიდეს პოტენციალს, საქართველო ბევრწლიანი პაუზის შემდეგ მოახერხებდა ევროპულ ოჯახში დაბრუნებას.

ტრაგედიაა ქართული სახელმწიფოებრიობისთვის, რომ დღეს ეს ორგანიზაცია საქართველოს პოლიტიკურ ვითარებას დიქტატურის დამყარებად აფასებს. ამ რეალობას ვერ ფარავს ვერც დიპლომატიური ენა.

სწორი პოზიციონირება სწორ დროს! PACE-ს მხრიდან ახლა სწორია ამ პოზიციის დაფიქსირება და მნიშვნელოვანი.

მთავარი აქცენტი გაკეთებულია იმაზე, რომ არ შეიძლება, დემოკრატიულ, ცივილიზებულ საზოგადოებაში, რომელსაც ესმის საკუთარი სახელმწიფო ინტერესები, მოქალაქეების კეთილდღეობა, ყველა ოპოზიციური ლიდერი ციხეში ჰყავდეს, ან პოლიტიკური დევნის ქვეშ. ეს ძალიან მაღალი დონის გზავნილია ე.წ. ხელისუფლებისთვის, რომ გონს მოეგოს ივანიშვილის რეჟიმი, გონს მოეგოს და დააბრუნოს ეს ქვეყანა იმ წერტილში, რა წერტილშიც უნდა საქართველო აბსოლუტურ უმრავლესობას. ეს არის ევროკავშირისკენ ინტეგრაციაში დაბრუნება.

ეს არის ტრაგედია, 1999 წლიდან 2025 წლამდე ამ გზის გავლა და დასრულება იმით, რომ PACE-მ შეაფასოს საქართველოს დღევანდელი მდგომარეობა დიქტატურის დამყარებად“,-აღნიშნა თაზო დათუნაშვილმა.