უკრაინაზე ინტენსიური ზეწოლა ხორციელდება, რათა სწრაფად მიიღოს ომის დასრულების „სამშვიდობო გეგმა“, რომელიც აშშ-ის პრეზიდენტ დონალდ ტრამპის ადმინისტრაციამ და რუსეთმა ერთობლივად შეიმუშავეს, - ინფორმაციას Financial Times-ი უკრაინელ ოფიციალურ პირებზე დაყრდნობით ავრცელებს.

გამოცემის ცნობით, უკრაინელი ოფიციალური პირების ინფორმაციით, რომლებმაც ანონიმურად დარჩენა ისურვეს, თეთრი სახლი „აგრესიულ“ გრაფიკზე მუშაობს წინადადებაზე საბოლოო შეთანხმების მიღწევისთვის, რათა ომი წლის ბოლომდე დასრულეს.

მათივე მტკიცებით, შეერთებული შტატები მოითხოვს, რომ ზელენსკი „მადლიერების დღემდე“, ანუ 27 ნოემბრამდე, დათანხმდეს სამშვიდობო შეთანხმებას. შეერთებულ შტატებს სურს, რომ შეთანხმება მოსკოვს თვის ბოლომდე წარუდგინოს და მთელი პროცესი დეკემბრის დასაწყისამდე დაასრულოს.

სტატიის ავტორები წერენ, რომ ტრამპის მიერ დამტკიცებული 28-პუნქტიანი „სამშვიდობო გეგმა“, რომელიც ამერიკელმა და რუსმა მომლაპარაკებლებმა შეიმუშავეს, კიევის მხრიდან მნიშვნელოვან დათმობებს მოითხოვს და ეს დათმობები უკრაინის წითელ ხაზებს კვეთს.

სტატიაში აღნიშნულია, რომ უკრაინა ამჟამად ამერიკული მხარისთვის წარსადგენ წინადადებებზე მუშაობს. სტატიაში ასევე ხაზგასმულია, რომ უკრაინული საზოგადოება, სავარაუდოდ, წინააღმდეგი იქნება ნებისმიერი შეთანხმების, რომელიც კაპიტულაციად ან მოსკოვისთვის უფრო მომგებიანად აღიქმება.