ზელენსკი ევროპელ ლიდერებთან გამართული სატელეფონო საუბრის თაობაზე განცხადებას ავრცელებს. შესაბამისი განცხადება უკრაინის პრეზიდენტს, ვოლოდიმირ ზელენსკის სოციალურ ქსელში აქვს გამოქვეყნებული.

კერძოდ, პარასკევს, 21 ნოემბერს, უკრაინის პრეზიდენტმა სატელეფონო საუბარი გამართა დიდი ბრიტანეთის პრემიერ-მინისტრ კირ სტარმერთან, საფრანგეთის პრეზიდენტ ემანუელ მაკრონთან და გერმანიის კანცლერ ფრიდრიხ მერცთან.

„განვიხილეთ უკრაინისთვის და მთელი ევროპისთვის სამშვიდობო გეგმა. ვაფასებ შეერთებული შტატების, პრეზიდენტ ტრამპისა და მისი გუნდის ძალისხმევებს ამ ომის დასასრულებლად. ამერიკული მხარის მიერ მომზადებულ დოკუმენტზე ვმუშაობთ. ეს უნდა იყოს გეგმა, რომელიც ნამდვილ, ღირსეულ მშვიდობას უზრუნველყოფს.

მჭიდროდ ვახდენთ კოორდინაციას, რათა პრინციპული პოზიციები იქნას გათვალისწინებული. მოვახდინეთ შემდგომი ნაბიჯების კოორდინაცია და შევთანხმდით, რომ შესაბამისი დონის გუნდები ერთად იმუშავებენ”,-წერს ზელენსკი.