რელიგიის საკითხთა სახელმწიფო სააგენტოს ორგანიზებით, დღეს, მორიგი საქველმოქმედო აქცია გაიმართა.

როგორც რელიგიის სახელმწიფო სააგენტოს მიერ გავრცელებულ ინფორმაციაშია ნათქვამი, რელიგიის სააგენტო და ქრისტიან-ბაპტისტთა ეკლესიების გაერთიანება აფხაზეთიდან იძულებით გადაადგილებულ პირებს დაეხმარნენ.

„რელიგიის სააგენტოს თავმჯდომარემ, ზაზა ვაშაყმაძემ ზუგდიდში მცხოვრები ოჯახებისთვის აფხაზეთის მთავრობას ჰუმანიტარული ტვირთი, 40 ფუთა ტანსაცმელი გადასცა. აფხაზეთის ავტონომიური რესპუბლიკის იძულებით გადაადგილებულ პირთა მინისტრმა, დავით ფაცაციამ და აფხაზეთის მომსახურების სააგენტოს დირექტორმა, ავთანდილ ქარაიამ მადლობა გადაუხადეს რელიგიის სააგენტოს დახმარებისთვის. აქციაში მონაწილეობდნენ ქრისტიან-ბაპტისტთა ეკლესიების გაერთიანების აღმასრულებელი მდივანი, ტარიელ პაპინაშვილი, რელიგიის სააგენტოს წარმომდგენლები ლაშა მჭედლიძე და სერგო კერესელიძე. საქველმოქმედო აქციები როგორც თბილისში, ისე რეგიონებში, პერიოდულად ტარდება და ორგანიზატორთა თქმით, მომავალშიც გაგრძელდება“,- ნათქვამია ინფორმაციაში.