ემიგრანტების ოჯახის წევრებსაც რომ ავუკრძალოთ ხმის მიცემა? ან გადმორიცხვები რომ ავკრძალოთ? აბა ომი გინდათ? - ამის შესახებ ნათქვამია "კოალიცია ცვლილებისთვის" ერთ-ერთი ლიდერის, ზურა (გირჩი) ჯაფარიძის განცხადებაში, რომელიც პოლიტიკოსის "ფეისბუქ" გვერდზე ვრცელდება.

ასე ეხმაურება ჯაფარიძე გავრცელებულ ბრალდებებს იმის შესახებ, თითქოს „დიფ სთეითი“ ქართველ ემიგრანტებზე ზეწოლას ახორციელებს.

"გავიგე, რომ "დიფსტეიტი" გავლენას ახდენს და ფაქტობრივად დეპორტაციის მუქარის ქვეშ აიძულებს ქართველ ემიგრანტებს ხმა მისცენ “ქოცების” წინააღმდეგ, რომ აქ შეიცვალოს ხელისუფლება, ძალაუფლება ხელში ჩაიგდონ "დიფსტეიტის" აგენტებმა და შემდეგ ომი გამოუცხადონ რუსეთს. არაა რთული გასაგები.

მაგრამ ვერ გავიგე, იგივე "დიფსტეიტისგან" დაშანტაჟებული ემიგრანტები, რომლებიც ყოველთვიურად აქ ინახავენ ოჯახებს გადმორიცხული ფულით, რატომ ვერ აიძულებენ მათზე ფინანსურად დამოკიდებულ ოჯახის წევრებს, აქ მისცენ ხმა ქოცების წინააღმდეგ, რაც გარდაუვალად დასრულდება ჩვენი მხრიდან მოსკოვის დაბომბვით? ნუ, ვოლგოგრადის მაინც. ამ რისკს როგორ ვაზღვევთ? ემიგრანტების ოჯახის წევრებსაც რომ ავუკრძალოთ ხმის მიცემა? ან გადმორიცხვები რომ ავკრძალოთ? აბა ომი გინდათ?

P.S თბილისის ღამის ეკონომიკის მინისტრი ვინ არის ამჟამად ხომ არ იცით?",- წერს ჯაფარიძე თავის განცხადებაში.