პირველადი მოხმარების სასურსათო პროდუქტებზე, 2025 წლის ოქტომბრის თვეში, 11,7%-იანი ინფლაცია დაფიქსირდა - უმძიმესია მაღალი ინფლაცია ჯანდაცვის მომსახურებაშიც, - ამის შესახებ „ძლიერი საქართველო - ლელოს“ აღმასრულებელმა მდივანმა, თაზო დათუნაშვილმა ბრიფინგზე განაცხადა.

დათუნაშვილის თქმით, ინფლაციის ფონზე „ხელისუფლების საუბარი მაღალ ეკონომიკურ ზრდაზე, ქვეყანაზე, რომელიც ბრწყინავს და მხოლოდ კარგისკენ მიდის ეკონომიკა, არის უტიფრობა და უბრალოდ, ტყუილი“.

„საახალწლო სუფრის შევსება საქართველოს მოქალაქეებს მძიმე ინფლაციის პირობებში მოუწევთ. ჩვენი თანამოქალაქეების მთავარი გამოწვევა ფასების კატასტროფული ზრდაა. სტატისტიკის დეპარტამენტმა ინფლაციის მაჩვენებელი გამოაქვეყნა. 2025 წლის ოქტომბრის წლიური მონაცემები 5,2%-ია, მაგრამ ეს გლობალური რიცხვი ვერ ასახავს რეალურ პრობლემას, რასაც საქართველოს მოქალაქეებს ინფლაცია უქმნის. კონკრეტულად კი, პირველადი მოხმარების სასურსათო პროდუქტებზე, 2025 წლის ოქტომბრის თვეში, 11,7%-იანი ინფლაცია დაფიქსირდა, რაც კატასტროფული მაჩვენებელია.

ამ ჯგუფში ინფლაციის მაჩვენებელია: ხილი 21%, ბოსტნეული 19,4%; შაქარი 17,2%, თევზეული 16,9%, ზეთი 13,9%, პური 12,4% და რძე/ყველი/კვერცხი 8,1%.

ძირითად პროდუქტებზე, ჯამში, მაჩვენებელი, დაახლოებით, 20%-ია. თუ ჩვენ ამას უფრო გლობალურ სურათში შევხედავთ, რა ვითარება გვაქვს ფასების ზრდასთან და დავაკვირდებით ვითარებას, 2012 წლიდან დღევანდელ დღემდე, ზემოთ ჩამოთვლილ პროდუქტებში ვნახავთ 103, 107, 150%-იან ზრდას. გარკვეულ სასურსათო პროდუქტებში 200%-იან ზრდას.

საქართველოს მოქალაქეებისთვის, აგრეთვე, უმძიმესია მაღალი ინფლაცია ჯანდაცვის მომსახურებაში. კერძოდ, სამედიცინო მომსახურების ფასები ოქტომბრის თვეში გაზრდილია 9,3%-ით, ხოლო საავადმყოფოების ამბულატორიული მომსახურება 9,2%-ით.

ამ ფონზე, ხელისუფლების საუბარი მაღალ ეკონომიკურ ზრდაზე, ქვეყანაზე, რომელიც ბრწყინავს და მხოლოდ კარგისკენ მიდის ეკონომიკა, არის უტიფრობა და უბრალოდ, ტყუილი“,- განაცხადა თაზო დათუნაშვილმა.