პირველად გავიცანი ეს ადამიანები, ჯგუფური ძალადობაო, საიდან მოუვიდა პროკურორს ეს აზრი? 14 წელი სკოლის დირექტორი ვიყავი, უამრავი თაობა გავზარდე, გთხოვთ, მითხრათ, რა დავაშავე, რა ზიანი მივაყენე სახელმწიფოს? - ამის შესახებ 4 ოქტომბერს განვითარებულ მოვლენებთან დაკავშირებით დაკავებულმა რამაზ მუმლაძემ სასამართლო პროცესზე განაცხადა.

რამაზ მუმლაძე მტკიცებულებს მოითხოვს, თუ რა გააფუჭა, სახელმწიფო ქონება გაანადგურა თუ ვინმეს სიტყვიერი შეურაცხყოფა მიაყენა.

„პირველად გავიცანი ეს ადამიანები, ჯგუფური ძალადობაო, საიდან მოუვიდა პროკურორს ეს აზრი? 14 წელი სკოლის დირექტორი ვიყავი, უამრავი თაობა გავზარდე, გთხოვთ, მითხრათ, რა დავაშავე, რა ზიანი მივაყენე სახელმწიფოს? საერთოდ არ ვიცნობ არც ერთს, საიდან მოვიდა ეს ყველაფერი? არასდროს არცერთო პარტიის წევრი არ ვყოფილვარ, აპოლიტიკური ვიყავი, არასდროს ვერეოდი პოლიტიკაში, გირაო არ შეუფარდოთო პროკურორმა, დაასაბუთოს რატომ. გაგვცეს პროკურორმა ამაზე პასუხი. რას ვაშავებ, რა გავაფუჭე, სახელმწიფო ქონება გავანადგურე, ვინმეს სიტყვიერი შეურაცხყოფა მივაყენე? დამიდონ მტკიცებულება, ფაქტები",- განაცხადა მუმლაძემ.

ცნობისთვის, ვლადიმერ გველესიანს, ზურაბ ჭავჭანიძეს, სერგო მეგრელიშვილს, გიორგი რურუას, ამირან დოლიშვილს, ანტონ ვარდანიძეს, გიორგი ქორქიას, ალექსანდრე ჩილაჩავას, გენადი კუპრეიშვილს, ლაშა ივანაძეს, ლევან ჯიქიას, სულხან ტუღუშს, ხვიჩა გოგოხიასა და რამაზ მუმლაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს.