„კოალიცია ცვლილებისთვის“ ერთ-ერთი ლიდერის, გედევან ფოფხაძის ინფორმაციით, შიმშილობის აქციის ერთი მონაწილე, სასწრაფო სამედიცინო დახმარების ჯგუფმა საავადმყოფოში გადაიყვანა.

მისი თქმით, ამ ეტაპზე აქცია კვლავ გრძელდება.

„დავით ჭელიძე სასწრაფო დახმარების ბრიგადამ საავადმყოფოში გადაიყვანა, მას გულის არითმიასთან დაკავშირებით ჰქონდა პრობლემა. ალბათ, გარკვეული პერიოდის განმავლობაში მას მოუწევს საავადმყოფოში დარჩენა, რადგან თავს ცუდად გრძნობდა.

რაც შეეხება აქციას, შიმშილობის აქცია გრძელდება და შეწყვეტას არ ვაპირებთ. თითოეული ჩვენგანის ჯანმრთელობაზე ვაპირებთ ზრუნვას, რომ აქციამ რომელიმე პირის ჯანმრთელობის მდგომარეობის დაზიანება არ გამოიწვიოს",- განაცხადა გედევან ფოფხაძემ.

ცნობისთვის, გედევან ფოფხაძემ პროტესტის უკიდურეს ფორმას 28 ოქტომბერს მიმართა და შიმშილობა დაიწყო. ოპოზიციონერ ლიდერთან ერთად შიმშილობა გამოაცხადეს დარეჯან ცხვიტარიამ და კიდევ რამდენიმე აქტივისტმა. მათი მოთხოვნაა, „გათავისუფლდნენ პოლიტპატიმრები და დაინიშნოს ახალი საპარლამენტო არჩევნები“.