პარლამენტის თავმჯდომარის შალვა პაპუაშვილის განცხადებით, „ნაციონალურ მოძრაობას ჰგონია, რომ „სააკაშვილის პერიოდია და სასამართლოს მითითებებს უნდა აძლევდნენ“.

ასე ეხმაურება პაპუაშვილი „ერთიანი ნაციონალური მოძრაობის“ თავმჯდომარე, თინა ბოკუჩავა განცხადებას, რომლის თანახმად პარტია საქართველოს საკონსტიტუციო სასამართლოს მოსამართლეებს მოუწოდებს, პარტიების აკრძალვის შესახებ სარჩელი წარმოებაში არ მიიღოს და დაუშვებლად ცნონ.

პაპუაშვილის თქმით, საბედნიეროდ 2012 წლის შემდეგ, ამ ქვეყანაში „ნაციონალურ მოძრაობას“ არავინ არაფერს ეკითხება.

„მგონი, „ნაციონალურ მოძრაობას“ ერევა და სააკაშვილის პერიოდი ჰგონია, როდესაც საკონსტიტუციო თუ სხვა სასამართლოებს მითითებებს აძლევდნენ რა გაეკეთებინათ და რა არა. პირიქით, „ნაციონალური მოძრაობა“ უნდა მივიდეს და საკუთარი ყურით მოისმინოს ის ბრალდებები, რაც მათ წინააღმდეგ არის. რა უნდა თქვან? ჩვენი ბრალდებაა, რომ წამების სისტემა შექმნეს. წამოდგებიან და იტყვიან, რომ არ შექმნეს და ტყუილია ის, რაც სტრასბურგის განაჩენში წერია? ყველა ბრალდებებთან დაკავშირებით მოუწევთ საჯაროდ მოისმინონ ყველა ბრალდება და პასუხი აგონ. საბედნიეროდ, 2012 წლის შემდეგ „ნაციონალურ მოძრაობას“ არავინ არაფერს ეკითხება ამ ქვეყანაში. ერევათ იმ დროში, როდესაც მათი რეჟიმი იყო დამყარებული და ჰგონიათ, რომ მითითებები უნდა მისცენ. ასე რომ, სასამართლო თავად გადაწყვეტს, რა უნდა გააკეთოს“,- განაცხადა შალვა პაპუაშვილმა.