ნიდერლანდებმა პოლონეთში Patriot-ისა და NASAMS-ის საჰაერო თავდაცვის სისტემები გაგზავნა, რათა გააძლიეროს ნატო-ს ლოგისტიკური ჰაბი ჟეშოვში, რომელიც უკრაინისთვის სამხედრო დახმარების მიწოდების მთავარი ცენტრია, - ამის შესახებ ნიდერლანდების თავდაცვის სამინისტრომ განაცხადა.

უწყების ცნობით, განლაგება 1-ელ დეკემბერს დაიწყო და 1-ელ ივნისამდე გაგრძელდება. პოლონეთში გაიგზავნა Patriot-ის ორი სისტემა, NASAMS-ის ერთი სისტემა და დაახლოებით 300 სამხედრო.

ქვედანაყოფი ინტეგრირებულია და ასევე მოიცავს დრონების საწინააღმდეგო სისტემებს, რომლებიც უზრუნველყოფენ მრავალშრიან საჰაერო დაცვას პოტენციური საფრთხეებისგან, ბალისტიკური და ფრთოსანი რაკეტებიდან დაწყებული დრონებით, ვერტმფრენებითა და გამანადგურებლებით დამთავრებული.

საუბარია NSATU-ს (ნატოს უსაფრთხოების დახმარებისა და უკრაინის წვრთნის) ცენტრის დაცვაზე, რომელიც კოორდინაციას უწევს მოკავშირეთა იარაღის მიწოდებას და უკრაინელი ჯარების წვრთნას. უკრაინას იარაღის მნიშვნელოვანი ნაწილი სწორედ ჟეშოვოს გავლით მიეწოდება.

ჰააგამ ხაზგასმით აღნიშნა, რომ მისია სამი ძირითადი მიზნის მიღწევას ისახავს მიზნად: ნატო-ს ტერიტორიის დაცვას, რუსული აგრესიის შეკავებას, უკრაინისთვის სტაბილური სამხედრო მხარდაჭერის გარანტირებას.

ნიდერლანდებმა ასევე გამოაცხადა Robin Radar-ისგან დრონის აღმომჩენი 100 რადარის შეძენის შესახებ, ტექნოლოგია, რომელიც უკვე გამოცდილია უკრაინაში მიმდინარე ომში.