უკრაინის შეიარაღებული ძალები უარყოფს რუსეთის განცხადებებს, რომ დონეცკის ოლქის სტრატეგიულად მნიშვნელოვანი ქალაქი პოკროვსკი დაიპყრეს.

„პოკროვსკში გრძელდება სამძებრო-საიერიშო ოპერაციები და მტრის ლიკვიდაცია ურბანულ რაიონებში“, - ნათქვამია უკრაინის აღმოსავლეთ სამხედრო სარდლობის გამოქვეყნებულ განცხადებაში.

„ისარგებლეს რა არახელსაყრელი ამინდის პირობებით, დამპყრობლებმა კიდევ ერთხელ სცადეს „დროშის აღმართვა“ ქალაქის ერთ-ერთ რაიონში, რათა პროპაგანდისტებს ეს გამოეყენებინათ იმის დასამტკიცებლად, რომ მათ მთელი ქალაქი პოკროვსკი აიღეს. ამის შემდეგ ისინი სწრაფად გაიქცნენ და მტრის ჯგუფების განადგურება გაგრძელდა“, - ნათქვამია განცხადებაში.

უკრაინის სწრაფი რეაგირების მე-7 კორპუსმა ასევე უარყო რუსეთის განცხადება პოკროვსკის აღების შესახებ.

„რთული სიტუაციის მიუხედავად, თავდაცვის ძალები კვლავ აგრძელებენ მტრის შეკავებას“, - ნათქვამია უკრაინის თავდაცვის ძალების მიერ გავრცელებულ განცხადებაში.

რუსეთის გენერალური შტაბის უფროსმა, ვალერი გერასიმოვმა პრეზიდენტ ვლადიმერ პუტინს 30 ნოემბერს არმიის სამეთაურო პუნქტში გამართული შეხვედრის დროს განუცხადა, რომ პოკროვსკი „გათავისუფლდა“.