ბელგიის პოლიციამ კორუფციის საქმეზე მიმდინარე გამოძიების ფარგლებში ევროკავშირის საგარეო ქმედებათა სამსახურის ყოფილი გენერალური მდივანი დააკავა, - ინფორმაციას Euractiv-ი ავრცელებს.

სტეფანო სანინო ევროკავშირის საგარეო ქმედებათა სამსახურის გენერალური მდივნის თანამდებობას 2021-2025 წლებში იკავებდა, ხოლო 2025 წლის 1-ელი ივლისიდან ახლო აღმოსავლეთის, ჩრდილოეთ აფრიკისა და სპარსეთის ყურის გენერალურ დირექტორატს ხელმძღვანელობს.

მანამდე, გამოცემა „ფრანს-პრესმა“ ინფორმაცია გაავრცელა, რომ პოლიციამ ევროკავშირის ყოფილი უმაღლესი წარმომადგენელი საგარეო პოლიტიკისა და უსაფრთხოების საკითხებში და ევროპის კოლეჯის მოქმედი რექტორი, ფედერიკა მოგერინი დააკავა.

შეგახსენებთ, დღეს ბელგიის პოლიციამ ევროკავშირის თანხების არამიზნობრივად გამოყენებასთან დაკავშირებით მიმდინარე გამოძიების ფარგლებში ევროკავშირის საგარეო ქმედებათა სამსახურსა და ევროპის კოლეჯში ჩხრეკა ჩაატარა. პოლიციამ სულ სამი ადამიანი დააკავა.