უკრაინის პრეზიდენტის, ვოლოდიმირ ზელენსკის განცხადებით, უკრაინას შეუძლია ევროკავშირში გაწევრიანების შესახებ მოლაპარაკებების ყველა კლასტერი მომავალი წლის ბოლომდე დახუროს.

პრეზიდენტის თქმით, უკრაინა მოლაპარაკების ექვსივე კლასტერის გასახსნელად ტექნიკურად მზად 2025 წლის ბოლომდე იქნება.

„ევროკომისია აღიარებს, რომ შეგვიძლია სამი კლასტერის გახსნა. სამი კლასტერი საჭირო რაოდენობის ნახევარია. ჩვენ ყველაფერი გავაკეთეთ ამის მისაღწევად. ყველას ესმის, რომ წლის ბოლომდე ტექნიკურად ყველაფერს გავაკეთებთ ექვსივე კლასტერის გასახსნელად. ამას ყველა აღიარებს“, - აღნიშნა ზელენსკიმ.

მისი თქმით, მომავალ წელს ევროკავშირის საბჭოს თავმჯდომარე ქვეყნები კვიპროსი და ირლანდია იქნებიან.

„გვსურს კლასტერების გახსნა კვიპროსის თავმჯდომარეობის დროს და შემდეგი ნაბიჯი მათი დახურვაა და ჩვენ ამის გაკეთება ირლანდიის თავმჯდომარეობის დროს გვსურს“, - აღნიშნა ზელენსკიმ.