ისრაელის სასამართლო ექსპერტიზის სამსახურმა დაასკვნა, რომ სამშაბათს „ჰამასის“ მიერ გადაცემული ნეშტი ღაზაში მყოფი ბოლო ორი დაღუპული მძევლიდან არცერთს არ ეკუთვნის, - ამის შესახებ ისრაელის პრემიერ-მინისტრის ოფისმა განაცხადა.

„ღაზის სექტორიდან გუშინ გამოკვლევისთვის მოტანილი ეს მონაცემები გარდაცვლილ მძევლებს არ უკავშირდება. იდენტიფიკაცია სასამართლო ექსპერტიზის ეროვნულ ცენტრში განხორციელდა“, - აცხადებენ პრემიერ-მინისტრის ოფისში.

ოქტომბერში მიღწეული ცეცხლის შეწყვეტის შეთანხმების თანახმად, „ჰამასმა“ ისრაელს გადასცა ნეშტი, რომელიც „წითელი ჯვრის“ განცხადებით, ღაზაში დარჩენილი ბოლო ორი გარდაცვლილი მძევლიდან ერთ-ერთს ეკუთვნოდა. ღაზაში დარჩენილი ორი გარდაცვლილი მძევალი არიან ისრაელელი პოლიციელი რან გვილი და ტაილანდის მოქალაქე სუდთისაკ რინტალაკი. ორივე მათგანი „ჰამასის“ მიერ ისრაელზე 2023 წლის 7 ოქტომბერს განხორციელებული თავდასხმის დროს გაიტაცეს.