რუსტემ უმეროვი უსაფრთხოების საკითხებში ევროპელი ლიდერების მრჩევლებს შეხვდება, - ამის შესახებ ინფორმაციას უკრაინის პრეზიდენტი, ვოლოდიმირ ზელენსკი ავრცელებს.

ვოლოდიმირ ზელენსკის ცნობით, ბრიუსელში დაგეგმილ დღევანდელ შეხვედრაში უკრაინის ეროვნული უსაფრთხოებისა და თავდაცვის საბჭოს მდივანთან, რუსტემ უმეროვთან ერთად მონაწილეობას უკრაინის გენერალური შტაბის უფროსი, ანდრეი გნატოვი მიიღებს.

„ეს პარტნიორებთან ჩვენს მიმდინარე კოორდინაციას წარმოადგენს და უზრუნველვყოფთ, რომ მოლაპარაკებების პროცესი აქტიური იყოს. უკრაინის წარმომადგენლები ევროპელ კოლეგებს მიაწვდიან ინფორმაციას იმის შესახებ, რაც გუშინ მოსკოვში ამერიკული მხარის მიერ გამართული შეხვედრის შემდეგ ცნობილია“, - წერს ზელენსკი X-ზე.

ასევე, უკრაინის პრეზიდენტის განცხადებით, უმეროვი და გნატოვი აშშ-ის პრეზიდენტის, დონალდ ტრამპის წარმომადგენლებთან შეხვედრისთვის მზადებას დაიწყებენ.