თქვენ ხედავთ, რომ არამარტო ექსტრემისტ, არამედ პირდაპირ ტერორისტსაც ხელს აფარებენ როგორც შიდა პოლიტიკური ძალები, ასევე გარე პოლიტიკური ძალები - ასეთი ფაქტები კიდევ უფრო ამაგრებს იმ სარჩელს, რომელიც წარდგენილია საქართველოს საკონსტიტუციო სასამართლოში, - ამის შესახებ პრემიერმა, ირაკლი კობახიძემ ალეკო ელისაშვილის საქმესთან დაკავშირებით “ლელო-ძლიერი საქართველოს” პოზიციის შეფასებისას განაცხადა.

როგორც პრემიერმა აღნიშნა, ექსტრემიზმიდან ტერორიზმის გამართლებაზე გადავიდნენ.

„თქვენ ხედავთ, რომ არამარტო ექსტრემისტ, არამედ პირდაპირ ტერორისტსაც ხელს აფარებენ როგორც შიდა პოლიტიკური ძალები, ასევე გარე პოლიტიკური ძალები. ექსტრემიზმიდან უკვე ტერორიზმის გამართლებაზე გადავიდნენ და ამისთვის ხელის დაფარებაზე გადავიდნენ. ეს აჩვენებს მათ სახეს. ასეთი ფაქტები კიდევ უფრო ამაგრებს იმ სარჩელს, რომელიც წარდგენილია საქართველოს საკონსტიტუციო სასამართლოში“,- აღნიშნა პრემიერმა.

შეგახსენებთ, “ლელო-ძლიერი საქართველოს” ერთ-ერთმა ლიდერმა, გრიგოლ გეგელიამ ალეკო ელისაშვილის საქმესთან დაკავშირებით საუბრისას განაცხადა: „ალეკო ჩვენი თანამებრძოლია, არსაიდან არ იქნება გარიცხული. მე პირიქით მინდა, “წავუყენო ბრალი” შალვა პაპუაშვილს, ალეკო ელისაშვილი 40-ლარიან სკამს ასხამდა ნავთს, მაგრამ შალვა პაპუაშვილი და მისი რეჟიმი ასობით ათას ქართველს, მათ შორის, ბავშვებს წამლავდა, ეგ არის ტერორიზმი“.

აღნიშნულით ის გამოეხმაურა პარლამენტის თავმჯდომარე შალვა პაპუაშვილის განცხადებას, რომ თუ პარტიები ალეკო ელისაშვილს ორშაბათამდე არ გარიცხავენ, „ტერორისტის მფარველი ორგანიზაციები გახდებიან”.