არ გამიკვირდება ამ ხელისუფლებისგან არანაირი განაცხადი, რომელიც მიზნად ისახავს ოპოზიციის განადგურებას, - ამის შესახებ „ძლიერი საქართველო-ლელოს“ ერთ-ერთმა ლიდერმა, სალომე სამადაშვილმა ტელეკომპანია „პალიტრანიუსის“ გადაცემა „360 გრადუსში“ განაცხადა, როდესაც უპასუხა კითხვას იმის შესახებ, მოსალოდნელია თუ არა, რომ „ქართული ოცნება“ ალეკო ელისაშვილის საქმეს გამოიყენებს „ლელოს“, როგორც პარტიის ლიკვიდაციისთვის.

სალომე სამადაშვილის განცხადებით, „ქართულ ოცნებას“ რუსეთისგან დავალება აქვს მიღებული, რომ უახლოეს მომავალში საქართველოში განადგურდეს ყველა პოლიტიკური და საზოგადოებრივი აქტორი.

„არანაირი ელისაშვილის მიერ ჩადენილი თეორიული დანაშაული არ არსებობდა, როდესაც „ქართულმა ოცნებამ“ „ლელო“ შეიტანა ასაკრძალი პარტიების ჩამონათვალში. შეგახსენებთ, რომ საკონსტიტუციო სარჩელი უკვე შესულია სასამართლოში და შესულია მოთხოვნა „ლელოს“ აკრძალვასთან დაკავშირებით. ამიტომ არანაირი ფორმალური საფუძველი არ სჭირდება ამ რეჟიმს იმისთვის, რომ ქართული დემოკრატიული, პროევროპული პოლიტიკური ძალების გასანადგურებლად იბრძოლოს. დავალება აქვთ რუსეთიდან მიღებული, რომ უახლოეს მომავალში განადგურდეს ყველა პოლიტიკური და საზოგადოებრივი აქტორი, რომელიც დღეს კიდევ იცავს საქართველოს ინტერესებს. ვუშვებ იმას, რომ დამატებით შეიძლება გამოიყენონ ეს საკითხი.

როდესაც ხარ იმ ქვეყნის მოქალაქე, სადაც მმართველმა პოლიტიკურმა ძალამ შეიძლება გამოიყენოს უცნობი ქიმიური ნივთიერება, მოგწამლოს, მერე ურთიერთგამომრიცხავი განცხადებები გააკეთოს გამოყენებული იქნა თუ არა ეს ნივთიერებები. ქვეყანაში, სადაც კრიმინალურ პასუხისმგებლობას აკისრებენ ადამიანებს ქუჩაში დემონსტრაციისთვის, ყველაფრის მოლოდინი შეიძლება გქონდეს. როგორც კი სისტემას დასჭირდება შენი განადგურება, ეს სისტემა გააკეთებს ყველაფერს შენს გასანადგურებლად“, - განაცხადა სალომე სამადაშვილმა.