აშშ ჯერ კიდევ ჩვენი ყველაზე დიდი მოკავშირეა. შესაბამისი განცხადება ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა აშშ-ის ეროვნული უსაფრთხოების 2025 წლის სტრატეგიის დოკუმენტთან დაკავშირებით გააკეთა.

კაია კალასის განცხადებით, აშშ-ის ეროვნული უსაფრთხოების სტრატეგიის დოკუმენტში ევროპული ინსტიტუტების შესახებ „ბევრი კრიტიკაა, თუმცა ნაწილი სიმართლეს წარმოადგენს“.

„ვფიქრობ, სხვადასხვა საკითხზე ყოველთვის ერთ აზრს არ ვიზიარებთ, მაგრამ საერთო პრინციპი ჯერ კიდევ ძალაში რჩება. ჩვენ უდიდესი მოკავშირეები ვართ და ერთმანეთის გვერდით უნდა დავრჩეთ“, - განაცხადა კალასმა.

მისი თქმით, ევროპა უფრო თავდაჯერებული უნდა იყოს.

„ევროპა საკუთარ ძალას სათანადოდ ვერ აფასებს. მაგალითად, რუსეთის წინაშე ჩვენ უფრო თავდაჯერებულები უნდა ვიყოთ“, - აღნიშნა ევროკავშირის უმაღლესმა წარმომადგენელმა.