ვოლოდიმირ ზელენსკი სტივ უიტკოფსა და ჯარედ კუშნერს შეხვდება, - ინფორმაციას გამოცემა Axios-ი ავრცელებს.

გამოცემის ინფორმაციით, აშშ-ის პრეზიდენტის მრჩევლები, სტივ უიტკოფი და ჯარედ კუშნერი უკრაინის პრეზიდენტს, ვოლოდიმირ ზელენსკის ორშაბათს, ბერლინში შეხვდებიან.

ასევე, გამოცემა წერს, რომ უიტკოფთან და კუშნერთან მოლაპარაკებებში მონაწილეობას საფრანგეთის პრეზიდენტი ემანუელ მაკრონი, დიდი ბრიტანეთის პრემიერ-მინისტრი კირ სტარმერი და გერმანიის კანცლერი ფრიდრიხ მერცი მიიღებენ.

შეგახსენებთ, გუშინ გერმანიის მთავრობამ ინფორმაცია გაავრცელა, რომ უკრაინაში ცეცხლის შეწყვეტის შესახებ მოლაპარაკებების მიზნით ვოლოდიმირ ზელენსკისა და ევროპელი ლიდერების ბერლინში ვიზიტი 15 დეკემბერს იყო დაგეგმილი.